Qostanai qalalyq №2 sotynyń ókimimen qarjy (investitsiialyq) piramidasyn uiymdastyryp, ókilettigin asyra paidalanǵany úshin Qostanai oblysynyń turǵyny sottaldy, dep habarlaidy "Ult aqparat".
Qostanai oblystyq sotynyń baspasóz qyzmetinen málim etkendei, 2017-2019 jyldar aralyǵynda azamat K. «Novyi Dom 2017» Tutyný kooperativiniń basshysy bola otyryp, jeke-dara basshylyq etý jáne TK qarajatyn maqsatty jumsaýdy baqylaý boiynsha ózine barlyq ókilettikterdi bergen.
«Ári qarai K. «arzan turǵyn úi» alý baǵdarlamalary men olardyń tiimdi tustary jaily jarnamanyń arqasynda qarjy piramidasyn qurady. Ol múliktik paida alý maqsatynda «Tutyný kooperativi týraly» QR Zańynyń talaptaryna baǵynbai, TK-ge úleskerlerdi óz betimen tańdap otyrǵan. TK-niń jarǵylyq kapitaly ashylǵan kezde 0 teńge bolǵan. Al onyń qarjylyq bóligi tek zardap shekkenderdiń qarajatynan jinalǵan», - dep habarlady oblystyq sottan.
63 jastaǵy alaiaq 296 adammen úleskerlik týraly jazbasha kelisimshart jasasyp, olardan 264 millionnan asa teńge alǵan. Alaiaq áieldiń qurbandary ár óńirden bolǵan.
Kúdiktiniń kinásin zardap shekkender men kýágerlerdiń sózderi, qylmystyq istiń zertteý materialdary rastady.
«Aiyptalýshy qarjy piramidasyn uiymdastyrý, ókilettigin asyra paidalaný boiynsha kináli dep tanylyp, oǵan 6 jyl bas bostandyǵynan aiyrý jazasy taǵaiyndaldy. Ol, sonymen qatar, kommertsiialyq jáne kommertsiialyq emes uiymdarda basqarýshy qyzmetterdi atqara almaidy. Jazasyn qaýipsizdigi barynsha tómen qylmystyq-atqarý júiesi mekemesinde óteidi», - delindi sotta.
Úkim zańdy kúshine engen joq.
