Qostanaida tehnikalyq qudyqtan ýly gazǵa ýlanyp qalǵan eki jumysshy shyǵaryldy, dep habarlaidy "Ult aqparat" oblystyq Tótenshe jaǵdailar departamentiniń baspasóz qyzmetine silteme jasap.
Vedomstvonyń habarlaýynsha, 16 tamyz kúni saǵat 22:41-de Qostanai oblysy TJD-nyń jedel-qutqarý jasaǵy kezekshi bólimine tótenshe jaǵdaidyń kýágeri bolǵan azamattan qońyraý túsken.
«Qostanaidyń saýda kásiporyndarynyń biriniń ashyq aýmaǵyndaǵy káriz tazartý qudyǵynda es-tússiz jatqan 1990 jáne 1991 jylǵy eki jumysshy tabyldy. Tundyrǵyny tazartý kezinde zardap shekkender ýly gazdyń qurbany bola jazdaǵan», - dedi TJD ókili.
8 minýttan keiin, 22:49-da qutqarýshylar barlyq jabdyqtarmen oqiǵa ornyna jetken, tynys alý apparatyn kiip, arqannyń kómegimen qudyqqa túsken. Eki-úsh metr tereńde jatqan jumysshylar qutqaryldy.
«Ammiak jáne kúkirtsýtekpen ýlanǵandardyń jaǵdaiy aýyr boldy. Olardyń bireýine qutqarýshylar dáriger kelgenge deiingi alǵashqy kómek kórsetken, ári qarai ekeýi de dárigerlerge tapsyryldy. Qazirgi kezde zardap shekkender aýrýhanada jatyr, jaǵdaiy qanaǵattanarlyq», - dep qorytty vedomstvodan.
