Foto: pixabay.com
Qostanaida áleýmettik-tehnikalyq kolledjiniń eki stýdentine qatysty qylmystyq is sotta qaralyp jatyr. 19 jastaǵy eki qyz psihotroptyq zattardy satýmen ainalysty, dep habarlaidy Sputnik Qazaqstan agenttigi Alaý portalyna silteme jasap.
Sot materialdaryna sáikes, 3-shi kýrsta oqityn eki qyz psihotroptyq zattardy Qostanaida ǵana emes, Petropavl qalasyna deiin baryp satqan. Ekeýi qańtar aiynda ustaldy. Olar psihotroptyq zattardy býyp-túiip, úilerdiń kireberisterine, poshta jáshikterine jáne taǵy basqa jasyryn jerlerge tyǵyp taratqan. Osylaisha, tórt ai boiy tabys tapqan. Olardyń "kýratory" da bolǵan. Ol bárin qashyqtan basqaryp, messendjerler arqyly tapsyryp berip otyrǵan.
Stýdent qyzdardy ustaý kezinde 50 orama tabyldy. Al jaldamaly páterden taǵy 192 gramm sintetikalyq esirtki shyqty. Zań boiynsha tárkilengen esirtki zattary iri kólem bolyp sanalady.
Eki stýdent qyzǵa birneshe bap boiynsha aiyp taǵylyp otyr. Kinási dáleldense, árbireýi 10 jylǵa bas bostandyǵynan aiyrylýy múmkin.
