Foto: ng.kz
Qostanai politsiia qyzmetkerleri Qostanaidaǵy balalar aýrýhanasyn tekserý úshin is materialdarynyń berilgeni týraly aitty, - dep habarlaidy Tengrinews.kz portaly.
Osydan 10 kún buryn úsh jasar balaǵa meditsinalyq mekemede ota jasalǵan, keiin ol komaǵa túsken. Oblystyq Politsiia departamenti ókilderi tekserý nátijesi belgili bolǵan soń is boiynsha protsestik sheshim qabyldanatynyn aitty.
"Balalarǵa jasalǵan operatsiialar boiynsha tekserý materialdary qazir dárigerlerdiń áreketin tekserý úshin ýákiletti organ - QR Densaýlyq saqtaý ministrligi Meditsinalyq-farmakologiialyq baqylaý komitetiniń Qostanai oblysy boiynsha departamentine jiberildi. Qorytyndy alǵannan keiin protsestik sheshim qabyldanady", - dedi Qostanai oblysynyń Politsiia departamentiniń baspasóz qyzmeti ókilderi.
Biyl 15 jeltoqsanda úsh jasar Ámir men taǵy úsh ul balaǵa – Igor (4 jas 10 ai), Aqnazar (3 jas 9 ai) jáne Ernazarǵa (2 jas 5 ai) narkozben josparly ýrologiialyq operatsiia jasaldy.
Keshke qarai balalardyń bireýiniń tynys alýy qiyndap ketken. Qazir ol jansaqtaý bóliminde jatyr. Balanyń ákesiniń aitýynsha, ulyna "jedel mi qan ainalymy buzylysy. Ýytty entsefalopatiia" diagnozy qoiylǵan. Olardyń aitýynsha, ata-anaǵa balanyń ne sebepti mundai jaǵdaiǵa túskeni týraly áli resmi túrde aitylǵan joq.
