Qostanai joǵarǵy meditsinalyq kolledjiniń 2-3 kýrs stýdentteri búginde ár aýdandaǵy emdeý mekemelerinde belsendi jumys istep júr, dep habarlaidy "Ult aqparat" oblys ákimdigi janynan qurylǵan jedel Shtabqa silteme jasap.
Búginde meditsina kolledjinde jalpy sany 594 shákirt bilim alýda. Onyń 154-i indetke qarsy kúrestiń aldyńǵy shebinde júr. 20 stýdent provizorlyq statsionarlarǵa jumysqa ornalasqan. Osy jyly meditsinalyq kolledjdi 264 túlek támamdap, mamandyqtaryna sai sertifikattaryn qoldaryna aldy. Sonyń ishinde 50 túlek birden feldsher, medbike, akýsher mamandyqtary boiynsha jumysqa shyǵyp ketken. Solardyń biri – 2-kýrs stýdenti Janar Saqymjanova. Onyń aitýynsha, qazirgi ýaqytta jaǵdai turaqtalyp keledi.
«Bastapqyda bárimizge ońai tigen joq. Stýdent bolsaq ta, meditsinalyq jedel kómek kórsetýdiń alǵyshartyn biletin edik. Dárigerlerdiń nusqaýymen olarǵa barynshy kómek kórsetip kelemiz. Bul bir jaǵynan ózimizge sabaq boldy», - deidi stýdent.
Jalpy, óńirde infektsiiaǵa saraptama júrgizý jáne emdeýmen 1166 maman ainalysady, olardyń 229-y – dárigerler. Oblysqa meditsinalyq mamandardy tartý boiynsha jumys kúsheitilgen. Ótken jyly aimaqqa 265 dáriger tartylsa, biyl taǵy 240 dáriger keledi dep kútilýde.
«2018 jyly oblystyq biýdjet esebinen alǵash ret «Jalpy meditsina» mamandyǵy boiynsha 80 eresek adam men 20 stýdentti oqytý bastalǵan. Onyń 24-i biyl oblys aýdandaryna jiberiledi. Jergilikti biýdjetten aýyldyq jerlerge kelgen dárigerlerdiń kóterme ústemaqysy 1,5 mln teńgege deiin kóbeitildi. Sondai-aq, «Qazaqstandyq ipotekalyq nesie berý» AQ arqyly Qostanai qalasynda 54 páter berildi. Aldaǵy ýaqytta meditsina qyzmetkerlerine arnalǵan taǵy 120 páter beriledi», - delingen shtab aqparatynda.
