Sanjar Boqaevtyń jeke mobilografy Ulan Núsipqoja ózine taǵylǵan barlyq aiyp boiynsha kinásin moiyndap, qylmysqa qatysy bar ózge adamdardyń áreketteri jóninde sotta aiǵaq berýge daiyn. Bul týraly onyń advokaty Mádi Áýekenov málimdedi.
Advokattyń aitýynsha, qorǵaý tarapynyń ustanymy ózgergen. Ulan Núsipqoja ózine taǵylǵan barlyq qylmystyq quqyq buzýshylyq boiynsha kinásin moiyndaý týraly sheshim qabyldaǵanyn aitqan. Atap aitqanda, ol aldyn ala sóz bailasý arqyly adamdar tobynyń urlyq jasaýy (QR QK 188-baby 2-bóliginiń 1-tarmaǵy), aǵashtardy zańsyz kesý (QR QK 340-baby 3-bóliginiń 1-tarmaǵy) jáne kórineý jalǵan aqparat taratý (QR QK 274-baby 2-bóliginiń 1 jáne 3-tarmaqtary) boiynsha taǵylǵan aiyptardy moiyndap, jasalǵan áreketterdiń mán-jaiyna qatysty sotta óz erkimen shynaiy ári dáiekti aiǵaq berýge nietti.
Advokat qorǵaýyndaǵy azamattyń aiǵaqtary tek óziniń is-áreketterine ǵana emes, qylmysqa qatysy bar ózge adamdardyń áreketterine de qatysty bolatynyn atap ótti.
Buǵan deiin sot Ulan Núsipqojanyń densaýlyq jaǵdaiyn eskerip, oǵan qatysty bultartpaý sharasyn kúzetpen ustaýdan úiqamaqqa aýystyrǵan bolatyn.
Ulan Núsipqoja advokatynyń málimdemesin qoldap, kinásin moiyndaitynyn jáne istiń mán-jaiy boiynsha sotqa shynaiy aiǵaq berýge daiyn ekenin jetkizdi. Buǵan deiin ol Sanjar Boqaev ózi úshin jaldaǵan advokat Sergei Kimniń qyzmetinen bas tartqan edi.
