Qostanai oblysynda tapsyrystyń bolmaýynan bir top júk kóligi júrgizýshisi jumysynan airyldy. Bul týraly Qazaqstannyń jihaz jáne aǵash óńdeý ónerkásibi kásiporyndary qaýymdastyǵynyń prezidenti Qanat Ibraev málim etti, dep habarlaidy QazAqparat.
«Bizdiń salanyń jumysyna aldymen pandemiia áserin tigizdi. Onyń saldarynan jihaz materialdarynyń baǵasy ósti. Sáikesinshe, jihaz jasaý, satý básekesi kúrt azaidy. Biyl sala qyzmetine 2 jaǵdai áser etti. Aldymen qańtardaǵy jappai tártipsizdikter, odan keiin Resei Federatsiiasyna salynyp jatqan sanktsiialar. Óz kezeginde, Resei jihaz ǵana emes, birqatar sala boiynsha eksportty toqtatyp jatyr», - dedi Qanat Ibraev Nur-Sultan qalasy kásipkerler palatasynyń óńirlik keńesiniń eseptik kezdesýinde.
Onyń aitýynsha, atalǵan másele elordaǵa ǵana emes, basqa da óńirlerge qatysty.
«Sonymen qatar qazir Resei orman aǵashy eksportyna tyiym salyp jatyr. Bul bizdiń orta jáne shaǵyn bizneske tikelei áser etedi. Onyń ishinde jihaz jasaý salasy da bar. Ásirese, Reseimen shekaralas ShQO, Qostanai oblystaryna aýyr soǵady. Mysaly, qazir Qostanai oblysynda shamamen 300 júk kóliginiń júrgizýshisi jumyssyz qaldy. Biz máseleni sheshýdiń jolyn qarap jatyrmyz. Degenmen, bul biznes emes, saiasat», - deidi ol.
