Qostanaida 1939 jyly latyn qarpinde jaryq kórgen Abai óleńderiniń jinaǵy tabyldy, dep habarlaidy "Ult aqparat".
Kitapty alǵash QR Ishki ister ministirligine qarasty Shyraqbek Qabylbaev atyndaǵy Qostanai akademiiasynyń qyzmetkeri Myrzabek Tuiǵanov jumys ornyna ákelip, áriptesterine tanystyrǵan.
«Qundy eńbek maǵan naǵashy atamnyń inisi, marqum Seremet Asyblekulynan mura bolyp qalǵan. Ol kisi kitapty kóp oqityn jáne sirek shyǵarylatyn shyǵarmalardy jii jinaityn edi. Jas kezimde aýylǵa bir barǵanymda naǵashym osy latyn qaripinde jaryq kórgen Abaidyń óleńder jinaǵyn syiǵa tartqan bolatyn. Sol ýaqyttan beri kitap meniń úiimde saqtalyp keldi. Biyl Uly Abaidyń týǵanyna 175 jyl, oǵan qosa Elbasy N.Á.Nazarbaevtyń bastamasymen elimizde latyn álipbiine kóshý jumystary júrgizilýde. Sondyqtan, kitapty úide saqtaǵansha, onymen arnaiy til mamandary tanysyp, zerttesin degen nietpen tanystyryp otyrmyn, - dedi kitap iesi Myrzabek Tuiǵanov.
Kitaptyń alǵy sózin Sábit Muqanov jazǵan. Qundy eńbekke uly aqynnyń óleńderimen qatar «Eskendir», «Ázim áńgimesi», «Masǵut» poemalary engen.
«Abai óleńderi toptastyrylǵan kitap negizi eki tom bolyp jaryqqa shyqqan. Tabylǵan sonyń birinshi tomy. Ekinshi tomy 1940 jyly Muhtar Áýezovtiń alǵy sózimen jaryq kórgen eken. Kitaptyń syrtqy muqabasy tozǵan, alǵashqy betindegi alǵy sózderden birneshe bet jáne sońyndaǵy túsiniktemelerden birneshe bet joǵalǵan. Al qalǵan óleńder men poemalary tolyq saqtalǵan», - dedi Shyraqbek Qabylbaev atyndaǵy Qostanai akademiiasy kommýnikatsiia bóliminiń basshysy Qurbanáli Ermuratov.
Myrzabek Tuiǵanov kitapty QR Ishki ister ministirligine qarasty Shyraqbek Qabylbaev atyndaǵy Qostanai akademiiasynyń murajaiyna tabystaǵan.
Aita keteiik, akademiia murajaiynda buǵan deiin Muhtar Áýezovtyń dombyrasy, sonymen qatar Shyraqbek Qabylabevtyń jeke buiymdary men qoljazbalary saqtalǵan.
