Qostanai jáne Soltústik Qazaqstan oblystaryn sý basý qaýpi joǵary. Bul týraly QR Ishki ister ministri Qalmuhanbet Qasymov Úkimet otyrysynda aitty, dep habarlaidy Baq.kz tilshisi.
Búgin Úkimet otyrysynda QR Premer-ministri Baqytjan Saǵyntaev elimizdiń birqatar óńirin sý basqanyn aityp, ishki ister ministrinen qazirgi jaǵdai týraly surady.
«Sońǵy kúnderi qardyń erýine jáne jaýyn-shashyndy aýa raiyna bailanysty Qaraǵandy oblysynda jaǵdai ýshyqty. Keshe oblys ákimimen birge aimaqty biikten baqyladyq. Barlyǵy 7 eldi mekende 33 úidi sý basty, 397 adam qaýipsiz jerge kóshirildi. Qazir barlyq úi sýdan tazartylyp, 300 astam adam baspanalaryna oraldy», - dedi Qasymov.
Ministrdiń aitýynsha, búkil respýblika boiynsha barlyǵy 10 eldi mekende 40 úidi sý basqan. Bundai jaǵdai Qaraǵandy, Pavlodar, Shyǵys Qazaqstan oblystarynda qalyptasty. Sondai-aq, elde 46 jol ýchaskesin sý basty, onyń 43-i avtomobil joly bolsa, úsheýi – temirjol ýchaskeleri. Qazirgi tańda temirjoldar jóndelip, poiyzdardyń qozǵalysy qalpyna keltirildi. Avtomobil joldarynda da jóndeý jumystary júrgizilip, 10 jolda apattyq jumystar jasalýda.
«Desek te, qazirgi tańda Qostanai jáne Soltústik Qazaqstan oblystaryndaǵy jaǵdai alańdatyp otyr. Qazgidromettiń málimetinshe, bul aimaqtardy sý basý qaýpi joǵary. Osyǵan orai, barlyq kúshterdi osy óńirlerge jumyldyryp otyrmyz», - dedi Q.Qasymov.
