Qostanai oblysynda sońǵy kúnderi koronavirýs infektsiiasy boiynsha epidemiologiialyq jaǵdaidyń kúrt nasharlaǵany baiqaldy. Osyǵan bailanysty óńirdiń bas memlekettik sanitar dárigeri úndeý jariialaidy, dep habarlaidy "Ult aqparat".
Qostanai oblysynyń memlekettik sanitar bas dárigeri Vladimir Nechitailonyń aitýynsha, aimaqta kún saiyn shamamen 50-100 adam indet juqtyrady. Aýrý juqtyrǵandar sany 518 adamǵa jetken.
«Apta saiyn syrqattaný jaǵdaiynyń ósýin taldaimyz. 8-14 maýsym aralyǵynda aýrýdyń 56 jaǵdaiy esepke alynǵan, ósim - 26,5%. 15-21 maýsym aralyǵynda – 251 jaǵdai, ósim 94%-dy qurady. Negizgi aýrý oshaǵy – Qostanai qalasy, munda 97 jaǵdaiǵa jetti, Rýdnyi qalasynda 24 derek tirkeldi. Buǵan deiin tirkelmegen ońtústik aimaqtarda naýqastanǵandar anyqtaldy. Syrqattar sanynyń ósýine bailanysty zerthanalar qosymsha júktememen jumys istei bastady. Naýqastardy emdeýge tartylǵan meditsina qyzmetkerleri de osylai jumys isteýde. Buǵan qosa Qostanai oblysynyń emdeý mekemelerinde oryn tapshylyǵy baiqalýda. Rezervtik tósek-oryndardy daiyndaý boiynsha jumystar júrgizilýde», - deidi Nechitailo.
Sanitar dárigerdiń pikirinshe, mundai jaǵdaidyń sebepteri karantin rejimin jappai oryndamaý bolyp otyr. Turǵyndar tarapynan da, kásipkerlik sýbektilerden de olqylyqtar baiqalady.
Shekteý sharalaryna qaramastan toi jasap, merekelik keshterdi ótkizip jatqandar bar. Qostanai qalasynyń 2 balabaqshasynda qyzmetkerler Covid-19 aýrýyn juqtyrǵan.
Sol sebepti óńirde 23 maýsymnan bastap karantin rejimi qatańdatylady. Naqty salalardaǵy shekteý sharalary týraly Qostanai oblysynyń bas memlekettik sanitar dárigeri úndeý jariialaidy.
