قوستاناي وبلىسىندا سوڭعى كٷندەرٸ كوروناۆيرۋس ينفەكتسيياسى بويىنشا ەپيدەميولوگييالىق جاعدايدىڭ كٷرت ناشارلاعانى بايقالدى. وسىعان بايلانىستى ٶڭٸردٸڭ باس مەملەكەتتٸك سانيتار دەرٸگەرٸ ٷندەۋ جارييالايدى, دەپ حابارلايدى "ۇلت اقپارات".
قوستاناي وبلىسىنىڭ مەملەكەتتٸك سانيتار باس دەرٸگەرٸ ۆلاديمير نەچيتايلونىڭ ايتۋىنشا, ايماقتا كٷن سايىن شامامەن 50-100 ادام ٸندەت جۇقتىرادى. اۋرۋ جۇقتىرعاندار سانى 518 ادامعا جەتكەن.
«اپتا سايىن سىرقاتتانۋ جاعدايىنىڭ ٶسۋٸن تالدايمىز. 8-14 ماۋسىم ارالىعىندا اۋرۋدىڭ 56 جاعدايى ەسەپكە الىنعان, ٶسٸم - 26,5%. 15-21 ماۋسىم ارالىعىندا – 251 جاعداي, ٶسٸم 94%-دى قۇرادى. نەگٸزگٸ اۋرۋ وشاعى – قوستاناي قالاسى, مۇندا 97 جاعدايعا جەتتٸ, رۋدنىي قالاسىندا 24 دەرەك تٸركەلدٸ. بۇعان دەيٸن تٸركەلمەگەن وڭتٷستٸك ايماقتاردا ناۋقاستانعاندار انىقتالدى. سىرقاتتار سانىنىڭ ٶسۋٸنە بايلانىستى زەرتحانالار قوسىمشا جٷكتەمەمەن جۇمىس ٸستەي باستادى. ناۋقاستاردى ەمدەۋگە تارتىلعان مەديتسينا قىزمەتكەرلەرٸ دە وسىلاي جۇمىس ٸستەۋدە. بۇعان قوسا قوستاناي وبلىسىنىڭ ەمدەۋ مەكەمەلەرٸندە ورىن تاپشىلىعى بايقالۋدا. رەزەرۆتٸك تٶسەك-ورىنداردى دايىنداۋ بويىنشا جۇمىستار جٷرگٸزٸلۋدە», - دەيدٸ نەچيتايلو.
سانيتار دەرٸگەردٸڭ پٸكٸرٸنشە, مۇنداي جاعدايدىڭ سەبەپتەرٸ كارانتين رەجيمٸن جاپپاي ورىنداماۋ بولىپ وتىر. تۇرعىندار تاراپىنان دا, كەسٸپكەرلٸك سۋبەكتٸلەردەن دە ولقىلىقتار بايقالادى.
شەكتەۋ شارالارىنا قاراماستان توي جاساپ, مەرەكەلٸك كەشتەردٸ ٶتكٸزٸپ جاتقاندار بار. قوستاناي قالاسىنىڭ 2 بالاباقشاسىندا قىزمەتكەرلەر Covid-19 اۋرۋىن جۇقتىرعان.
سول سەبەپتٸ ٶڭٸردە 23 ماۋسىمنان باستاپ كارانتين رەجيمٸ قاتاڭداتىلادى. ناقتى سالالارداعى شەكتەۋ شارالارى تۋرالى قوستاناي وبلىسىنىڭ باس مەملەكەتتٸك سانيتار دەرٸگەرٸ ٷندەۋ جارييالايدى.
