«Arqalyq-Torǵai» avtojolynda Jangeldin aýdandyq aýrýhanasynyń jedel járdem kóligi men «Shevrole Niva» jeńil avtokóligi soqtyǵysty. Alǵan jaraqatynan feldsher kóz jumdy. Politsiia tergeý amaldaryn bastady, dep habarlaidy QazAqparat.
Jol apaty keshe keshke 22.30 shamasynda «Arqalyq-Torǵai» avtojolynda bolǵan.
«Atalǵan fakti boiynsha QR QK 345-1-baby 3-tarmaǵy boiynsha sotqa deiingi tergeý amaldary bastaldy. Qazirgi ýaqytta saraptama taǵaiyndalǵan», - dep atap ótti Qostanai oblysy PD baspasóz qyzmeti.
Belgili bolǵandai, «Shevrole Niva» júrgizýshisi dala jolymen júrip kele jatyp, manevrdiń qaýipsiz ekenine kóz jetkizbesten, ekinshi joldan basty jolǵa shyǵyp ketken.
Saldarynan Jangeldin ortalyq aýdandyq aýrýhanasynyń sanitarlyq arnaiy avtokóligi – «ÝAZ»-ben soqtyǵysqan.
«Jol apaty saldarynan «ÝAZ» avtokóliginde bolǵan feldsher kóz jumdy. Áiel alǵan jaraqattarynan aýrýhanada qaitys boldy. Sanitarlyq arnaiy kóliktiń júrgizýshisi kóptegen jaraqat alǵan», - dep tolyqtyrdy vedomstvodan.
Júrgizilgen saraptama barysynda «Shervole Niva» kóliginiń 32 jastaǵy júrgizýshisi mas kúide bolǵany anyqtaldy.
Instagram jelisinde oblystyq densaýlyq saqtaý basqarmasy marqumnyń otbasyna kóńil aitty.
«Jangeldin aýdandyq aýrýhanasynyń medbikesi 1969 jyly týǵan Nursáýle Búrkitbaiqyzy Asqarova bir aýrýhanada úzilissiz jumys istedi. 33 jyl buryn ol Arqalyq meditsinalyq kolledjin bitirip, osynda jumysqa kelgen. 1989 jyldan bastap «Jangeldin ortalyq aýrýhanasy» KMK túrli bólimshelerinde, sońǵy jyldary emhananyń medbikesi bolyp jumys istedi. Meiirimdi, aqkóńil jan edi. Áriptesteri men patsientteriniń esinde óz isiniń mamany bolyp qaldy. Qaitys bolǵan áriptesimizdiń otbasyna shyn nietpen kóńil aitamyz», - delingen habarlamada.
