Qostanai oblysynda 25 mamyrdan bastap karantindi jeńildetýdiń jańa kezeńi engiziledi. Bul týraly búgin oblys ákiminiń qatysýymen ótken apparat májilisinde aityldy, dep habarlaidy "Ult aqparat".
Arhimed Muhambetov koronavirýs infektsiiasynyń taralýyna jol bermeý jónindegi jedel shtabtyń kezekti otyrysy ótkizdi. Búginde aimaqta COVID-19 indetiniń 112 jaǵdaiy tirkelgen, onyń ishinde 50 adam saýyǵyp, 2 naýqas qaitys bolǵan.
Jedel shtab otyrysynda Jitiqara qalasyn qospaǵanda, oblys aýmaǵynda karantindik is-sharalardy jeńildetýdiń 4-shi kezeńin engizý týraly sheshim qabyldandy.
Sonymen, 25 mamyrdan bastap kelesi nysandardyń jumysyna ruqsat etiledi:
1. Azyq-túlik emes saýda ortalyqtary men dúkender (alańy 2000 sh.m. astam), saýda, oiyn-saýyq ortalyqtary;
2. Mektepten tys qosymsha bilim berý uiymdary (damý, bilim berý ortalyqtary, úiirmeler, fakýltativter jáne t.b);
3. Banketter, úilený toilar, mereitoilar, ataýly is-sharalar, sondai-aq mektep bitirý is-sharalarynan tys, saǵat 7-00-den 22-00-ge deiin ýaqytta kelýshiler sany 30 adamnan aspaityn qoǵamdyq tamaqtandyrý obektileri, jazǵy terrasalar (ústelderdi araqashyqtyǵy keminde 2 metr);
4. Massaj salondary;
5. 30 adamǵa deiin repititsiia ótkizýge arnalǵan kitaphanalar, mádeniet obektileri;
6. 30 adamǵa deiingi toptarǵa, onyń ishinde trenajer zaldaryna jattyǵý ótkizetin sport obektileri;
7. Qosymsha qyzmet kórsetýsiz qonaq úiler (SPA, basseinder, jattyǵý zaldary, biliard, kinozaldar, konferentszaldardy jalǵa alý).
«Oraza Ait merekesin kópshilik qaýymsyz, týǵan-týystar men jaqyndardyń ortasynda merekeleýdi usynamyn. Qazir virýsqa bailanysty turaqty túrde monitoring júrgizilip jatyr jáne karantindik sharalardy odan ári jeńildetý týraly sheshim epidemiologiialyq jaǵdaidy eskere otyryp, kezeń-kezeńmen qabyldanady», - dedi oblys ákimi.
