Qostanai oblysynda egin jinaý naýqany erte bastalyp ketti. Bul týraly Arhimed Muhambetovtiń tóraǵalyǵymen ótken selektorlyq agrokeńeste aityldy, dep habarlaidy QazAqparat.
Biylǵy jazdyń ystyǵy, jaýyn-shashynnyń joqtyǵy aimaqtaǵy dándi daqyldyń ósýine aitarlyqtai tejeý bolyp otyr. Qýańshylyqqa bailanysty óńirimizde egin jinaý naýqany ádettegiden erte bastalyp ketti. Keibir aýdandarda astyq orý qarqyndy júrip jatyr. Ásirese, oblystyń ońtústik bóliginde egin shyǵymy tómen. Bul sharýalardyń jaǵdaiyn alańdatýda.
«Men demalys kúnderi aýdandarǵa shyǵyp, diqandarmen júzdestim. Sharýalar 2012 jyldan beri eki-úsh tsentner bidai jinap kele jatqanyn ashyq aityp otyr. Qatarynan jeti-segiz jyl boiy egin shyǵymynyń durys bolmaýy bárimizdi alańdatady. Janar-jaǵarmai, tuqym, tehnika, jumyskerlerdiń jalaqysyna shyǵyndalǵan agroónerkásip taýaryn óndirýshiler úshin bul úlken salmaq bolatyny anyq. Negizi, astyqtan paida kórmeitinder bolsa, mal salasyna bet burǵandary durys», - dedi Arhimed Muhambetov.
Sonymen qaatar ol kúzgi egis naýqanyn oidaǵydai ótkizý, tyǵyryqtan shyǵýdyń tetikterin qarastyrýdy tapsyrdy. Qazir ońtústik-batys aýdandarda jem-shóp ázirleý kórsetkishi 24-50 paiyzǵa ǵana oryndalǵan.
Jiynda onlain bailanysqa shyqqan Qazaqstannyń Eńbek Eri Boris Kniazev óz tájiribesimen bólisti. Aitýynsha, biylǵy qurǵaqshylyqty sonaý 1975 jylǵymen salystyrýǵa bolady.
«1984 jyly da qatty qýańshylyq boldy. Biraq ol jyly tamyz aiynda jaýyn-shashyn tústi de, shóptiń ósýine sep bolyp edi. Mundai kezderde mal jei bermeitin shópter men qamysqa jem aralastyryp malǵa beremiz. Osy joly bizdiń seriktestik kórshi Jitiqara aýdanynan shóp shaýyp jatyr. Negizi, ózen-kólderdiń jiegin, tehnika jetken jerdegi qamystardy, oi jerlerdegi ylǵalda jatqan shópterdi qaldyrmai shaýyp alǵan jón. Aldyn ala saban, súrlem daiyndaý qajet», - dep keńes berdi ol.
Arhimed Muhambetov kúzgi jiyn-terimdi barynsha oidaǵydai oryndap, astyq orý kezinde urlyq-qarlyqqa urynbai, qatań kúzet bolýyn aitty. Sondai-aq qoldaǵy qor qarjysyn múmkindiginshe únemdep jumsaýyna keńes berdi. Máselen, Arqalyq qalasynyń ákimi Eldar Kúzenbaev jergilikti sharýashylyqtar tarapynan 5 traktor, 7 kombain satyp alýǵa qujattar ázirlenip jatqanyn aitqan bolatyn.
«Tek arqalyqtyqtarǵa ǵana emes, barsha diqandarǵa óte qajettilik bolmasa, tehnika satyp alýǵa asyqpańyzdar. Aldymen jinaǵan dánin barynsha joǵary baǵaǵa satyp, keler kóktemge tuqym quiyp alý, 2020 jyldyń qazan aiyna deiin jumysshylardyń jalaqysyn tólei alatyndai qaýqary bolý, qysta jol tazartý, basqa da ózekti máselege den qoiýyna keńes beremin. Sondai-aq, halyqtyń mal basyn saqtap qalýyn airyqsha nazarǵa alyńyzdar», - dedi Arhimed Muhambetov.
