Qostanai oblysynyń 6 aýdanynda sanitarlyq beket jumys istei bastady. Bul týraly Óńirlik kommýnikatsiialar alańynda ótken brifingte Jergilikti politsiia qyzmeti basqarmasynyń bastyǵy Qurmet Májikenov málim etti, dep habarlaidy "Ult aqpara".
Buǵan deiin Qostanai oblysynda 12 sanitarlyq beket ornatylǵanyn habarlaǵan edik.
Qazir onyń sany 20-ǵa deiin kóbeiip otyr.
«Búgin saǵat 00.00 - den bastap oblysta qosymsha 8 beket qoiyldy. Olardyń 5-eýi Arqalyq qalasyn jáne Qarasý, Sarykól, Qamysty jáne Uzynkól aýdandarynda bolsa, 3-eýi –Rýdnyi qalasynda. Beketterdegi jumysty qajetti qorǵanys quraldarymen jabdyqtalǵan politseiler men meditsina qyzmetkerleri júzege asyrady. Bekettegi qyzmetti táýligine 12 saǵattan aýysymmen atqarady. Beketterdi qoiýdaǵy negizgi mindet – koronavirýstyq infektsiianyń taralýyna jol bermeý úshin halyqpen aldyn-alý jumystaryn júrgizý. Meditsina qyzmetkerleri dene temperatýrasyn ólshei otyryp, júrgizýshiler men jolaýshylardy vizýaldy profilaktikalyq tekserýden ótkizedi», - deidi Qurmet Májikenov.
Politsiia qyzmetkerleri sanitarlyq beket arqyly ótetin kólikti tekserip, esepke alady, sondai-aq oblystyń bas memlekettik sanitarlyq dárigeriniń qaýlysynda kórsetilgen shekteý sharalarynyń saqtalýyn qadaǵalaidy.
