Qostanai oblysynda 60 úidi sý basty. Bul týraly oblystyq Tótenshe jaǵdailar departamentiniń basshysy Talǵat Kákimov brifing barysynda málim etti, dep habarlaidy "Ult aqparat".
Departament basshysynyń aitýynsha, ázirge qar sýynan Qarasý aýdanynyń Qaramyrza aýyly ǵana zardap shekti. Qalǵan óńirlerdegi jaǵdai birqalypty.
«7 sáýir kúni tańerteń Tintýir ózeninde seń júrip, sý qalypty aqty. Saǵat 15.30 shamasynda aýa raiy kúrt qubylyp, jeldiń ekpini sekýndyna 30 metrge deiin jetti. Jel birde ońtústik-batystan soqsa, endi birde soltústik-batysqa aýysty. Sonyń áserinen ózende 25-30 santimetrge deiin jetetin tolqyn paida bolyp, ózen arnasynan shyqty. Sý Qaramyrza eldi mekenine deiin jetti. Saǵat 16.30-da 60 turǵyn úidi sý basty. 8 sáýirde sý deńgeiiniń qarqyndy tómendeýi bastaldy», - dedi Talǵat Kákimov.
Sý úilerdiń ishine deiin kirmegen, TJD qyzmetkerleri arnaiy qurylǵylardyń kómegimen der kezinde sýdy sorǵyzý jumystaryn júrgizgen.
Oblys ákimdigi sý tasqynynan zardap shekken turǵyndardy qoldaý úshin sý basqan úidiń ielerine 50 AEK (138 900 myń teńge) kóleminde jáne aýlasyna sý kirgen turǵyndarǵa 25 AEK (69 450 myń teńge) kóleminde ótemaqy tólemek. Qazirgi ýaqytta turǵyndarǵa azyq-túlik qorjyny ázirlenip jatyr.
