Ál-Farabi kóshesinde ornalasqan Qostanai qalalyq aýrýhanasy búginnen bastap sýyq tiiý, tumaý juqtyrý jáne ókpesi qabyný diagnozymen túsken naýqastardan basqa aýrýlardy qabyldaýyn toqtatty, – dep habarlaidy oblystyq Densaýlyq saqtaý basqarmasynyń baspasóz qyzmeti.
30 maýsymnan bastap qalalyq aýrýhana 250 oryndyq provizorlyq statsionar qyzmetin atqaratyn bolady. Densaýlyq saqtaý basqarmasy basshysynyń buiryǵymen provizorlyq statsionarǵa basqa emhanalardaǵy dárigerler men medbikeler qosymsha jumysqa alyndy.
«Qalalyq aýrýhanadaǵy salalyq dárigerlerdiń bári provizorlyq naýqastardy qabyldap, tek solardy emdeýmen ainalysatyn bolady. Sonymen qatar naýqastardyń kezekke turý máselesi rettelip, emdeý mekemesinde Sall-ortalyq (39-37-77) uiymdastyryldy. Mundaǵy jedel kómek kórsetý bólimi men jaraqat bólimi oblystyq aýrýhanaǵa kóshirildi. Qostanai turǵyndaryn sabyr saqtaýǵa shaqyramyz. Qazir dárigerler kúsheitilgen rejimde jumys istep jatyr. Sizder bas sanitarlyq dárigerdiń nusqaýyn oryndaý arqyly, bizge kóp kómek tigizetinderińizdi túsinińizder. Jasyryn jiyn ótkizýdi, qonaqqa barýdy, qonaq shaqyrýdy qoiyńyzdar. Úiden betalbaty shyqpańyzdar. Jaqyndaryńyzdy, týys-týǵandaryńyzdy qorǵańyzdar», - dep habarlady basqarmanyń baspasóz qyzmeti.
Sonymen qatar turǵyndar 8 777 375 44 77 bailanys nómiri boiynsha basqarmaǵa suraq joldai alady.
