Jyldyń sońyna deiin Aqmola oblysyndaǵy Qosshy qalasynda 2400 oqýshyny qamtityn, eki aýysymda jumys isteitin mektep paidalanýǵa berilmek.
Bul týraly óziniń Facebook paraqshasynda QR Bilim jáne ǵylym ministri Ashat Aimaǵambetov jazdy, dep habarlaidy "Ult aqparat".
«Búgin Aqmola oblysyndaǵy №2 Qosshy orta mektebinde boldym. Aimaqtaǵy eń problemalyq mektepterdiń biri bolǵandyqtan dál osy bilim berý uiymyn tańdadym. Bul oqý ornynda búgin 600-den astam bala mektep tabaldyryǵyn attady. Alfavit boiynsha 1-synyptyń rettiligi «Y» árpine deiin jetedi. Bilim ordasyndaǵy oqýshy oryndarynyń sany 1200 alýshyǵa jetedi. Oqý protsesi úsh aýysymda júrgiziledi», - deidi ministr.
Onyń sózinshe, dál osy máseleni Memleket basshysy Qasym-Jomart Kemeluly Toqaev óziniń búgingi Qazaqstan halqyna Joldaýynda aitty. Prezident atap ótkendei, ýrbanizatsiia men demografiianyń ósýine bailanysty 2025 jylǵa qarai oqýshy ornynyń tapshylyǵy shamamen 1 milliondy quraidy. Máseleni sheshý úshin biyl 200 jańa mektepti paidalanýǵa berý josparlanyp otyr.
«Al, 2025 jylǵa deiin bizdiń aldymyzǵa ákimdiktermen birlese otyryp, myń mektep salý boiynsha mindet qoiyldy. Aqmola oblysynyń Qosshy qalasyndaǵy mektepterdegi oqýshy ornynyń tapshylyǵy máselesine keletin bolsaq, osy jyldyń sońyna deiin bul jerde 2400 oqýshyǵa arnalǵan ári eki aýysymda jumys isteitin jańa mektep ashylady dep josparlanyp otyr. Kelesi jyly 2400 oqýshyǵa arnalǵan eki aýysymda jumys isteitin taǵy bir mektep ashylady. Sonymen qatar qalada 2023 jylǵa deiin taǵy birneshe mektep salý josparda bar», - dedi Ashat Aimaǵambetov.
Sondai-aq mektepter salý jónindegi jumys barlyq óńirde ozyq qarqynmen júrgizilýi tiistigin atap ótti. Ákimdikter mektep qurylysy úshin jer ýchaskelerin aldyn ala rezervke ustap, tek maqsatty paidalanylýyn qamtamasyz etýi qajet.
«Mektep qurylysy barysynda qoǵamdyq monitoringti qamtamasyz etý jáne Prezident tapsyrmasyn oryndaý úshin arnaiy aqparattyq portal daiyndap jatyrmyz. Ol jerde qandai eldimekende mektep salynatynyn, qurylystyń aǵymdaǵy jaǵdaiy men barysyn kórýge bolady.
Sapaly bilim, jaily jáne qaýipsiz jaǵdai jasaý úshin eń aldymen materialdyq-tehnikalyq bazany jáne oqytý úshin sanitarlyq normalarǵa sáikes jaǵdailardy qamtamasyz etý qajet ekenin túsiný qajet», - dep túiindedi ol.
