Aqmola oblysy ákimi Ermek Marjyqpaev Qosshy aýylynyń elorda aýmaǵyna qosylýy múmkindigine qatysty pikir bildirdi, dep habarlaidy "Ult aqparat".
«Bul másele turǵyndardyń kóbisin alańdatyp júr. Bul eldi mekende 50 myńnan astam adam turyp jatyr. Osy aýylǵa qatysty jaǵdaidy Memleket basshysy, Úkimet basshylyǵy erekshe baqylaýda ustap tur. Bul turǵyda birneshe ret talqylaýlar da boldy, iaǵni aýyldyń qarjylyq ári ekonomikalyq baǵyttary esepteldi. Alaida osy máseleni ulttyq sanaq júrgizgenge deiin shegerdik. Biz aldymen ol eldi mekende qansha adam turyp jatqanyn naqty anyqtaýymyz kerek», - dedi ákim Ortalyq kommýnikatsiialar qyzmetinde.
Onyń aitýynsha, sharýashylyq kitaptaǵy tizim boiynsha Qosshyda 36 myń adam turyp jatyr. Úilerdi aralaý kezindegi málimette 60 myń adam bar ekeni anyqtaldy. Al kommýnikaýiia men telefondar boiynsha 55 myń adam tirkelgeni belgili boldy.
«Osy ártúrli málimetti eskerip, aýylda qansha adam turatynyn aiqandaý qajettigi bar. Osynyń barlyǵyn pysyqtap, tiisti sheshim qabyldanady», - dedi Ermek Marjyqpaev.
Eske sala keteiik, elimizde ulttyq sanaq júrgizý bir jyl keiinge qaldy.
Úkimet ótken jyly 19 maýsymda 2020 jyly ulttyq sanaq ótkizý týraly qaýly shyǵarǵan. Oǵan sáikes, Qazaqstan Respýblikasynyń ulttyq halyq sanaǵy biylǵy 1-30 qazan aralyǵynda ótýge tiis edi. Elimizde koronavirýs infektsiiasynyń taralýy men engizilgen karantin sharalaryna bailanysty ulttyq halyq sanaǵyn 2021 jylǵy qazan aiyna aýystyrý jóninde sheshim qabyldandy.
