Almaty oblysy Besaǵash aýylynda elý otbasy kóshesiz qalyp, úilerine jetý úshin ainalyp ótýge májbúr, dep habarlaidy Almaty.tv arnasy.
Turǵyndardyń aitýynsha, ákimdikten jer alǵanda jaýaptylar kartadan kósheni nusqap turyp, joldy kórsetken eken. Keiin 1,5 gektar jerdiń iesi tabylyp, kósheni qorshap alǵan. Amalsyz qalǵan aýyl adamdary endi kóligin aýyl syrtyna tastap, ózderi ózendi kesip ótip júr. Al jergilikti bilik máseleni sheshe almaityndaryn aityp, aqtaldy.
«Qazir osy jerde eki adamnyń ýchastogy bar. Biz ákimdik ókilderin shaqyrdyq, biraq bul kisiler zańdy túrde satyp alǵan. Kólikti joldyń arǵy jaǵyna tastaimyz, ózennen beri qarai jaiaý ótemiz. Adam ótetin kópir salyp aldyq», – dedi Besaǵash aýylynyń turǵyny Álisher Áýkenbaev.
Aǵashy aiyrylyp, temiriniń tozyǵy jetken ótkeldi jurt «qyl kópir» dep atap ketken. Kópirdiń arǵy betine kóligin tastap júrgen jurt tonaýshylardyń da dáýiri júrip turǵanyn aitady. Eki kúnniń birinde terezesin shaǵyp, bólshekterin urlap ketetin kórinedi.
«Osy jerdi aldyq, óitkeni basqalai múmkindik bolmady. Mysaly páter satyp ala-almaimyz. Oǵan aqshamyz jetpeidi. Jerdi 2-3 millionǵa aldyq, qýanyp úi saldyq», – dedi Besaǵash aýylynyń turǵyny Syrym Ádilǵazin.
Al jergilikti bilik «biz de sharasyzbyz» dep shaǵymdanǵan jurttyń úmitin sóndirgendei boldy. Óitkeni kósheni qorshap alǵan azamattyń zań turǵysynan quqyǵy bar eken.
«Biz jer iesiniń resmi ókili Rinatqa barlyq nusqalardy kórsettik. Bizge eki metr jer berseńiz, sizge dál sol mańnan basqa jer telimin bólip bereiik dedim, kelispedi. Jer qatynastary mamandary keldi ólshedi, tekserdi. Onyń gos aktisi bar, zańdy. Biraq ol jerge naqty ne salatynyn aitpady», – dedi Besaǵash aýyldyq okrýgi ákiminiń orynbasary Álibek Ramazanov.
«Sala almaidy. Ony áýeli jol depbas josparǵa engizý kerek», – dedi Talǵar aýdany TÚKSh, jolaýshylar kóligi, avtomobil joldary jáne turǵyn úi inspektsiiasy bóliminiń bas mamany Ashat Dosjanov
Kóshesiz qalǵan elý otbasy kókeikesti máselesin aitqanymen, kóńil kónshiter jaýap ala almady. Óitkeni ákimdik ókilderi jol ashyp berýi úshin aldymen jer telimin ákimdik balansyna alý kerek eken. Al oǵan jer iesi úshti-kúili qarsy bolyp otyr. Endi aýyl adamdaryna basqa baǵyttan jol túsýi múmkin. Alaida búgin-erteń úilerine emin-erkin kirip-shyǵýy múmkin bolmaityn kórinedi. Al Talǵar aýdanynyń sáýletshileri qujatty qaita qaraý keregin aitty.
