«Aqordada» Qazaqstan Respýblikasy Prezidentiniń janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komissiianyń otyrysy ótti. Memlekettik hatshy Qyrymbek Kósherbaevtyń tóraǵalyǵymen ótken jiynda baǵdarlamany iske asyrýdyń 2019 jylǵy nátijeleri men alda atqarylatyn jumystyń jańa basym baǵyttary qaraldy, dep habarlaidy "Ult aqparat" Aqordaǵa silteme jasap.
Memlekettik hatshy Qazaqstan Respýblikasynyń Tuńǵysh Prezidenti – Elbasynyń «Bolashaqqa baǵdar: rýhani jańǵyrý» jáne «Uly dalanyń jeti qyry» maqalalarynda aitylǵan baǵdarlamalyq mindetter aiasynda qazaqstandyq qoǵamdy rýhani jańǵyrtý boiynsha josparlanǵan jumystar atqarylǵanyn aitty. Olar ulttyq biregeilikti saqtaýǵa, pragmatizmge, bilimniń saltanat qurýyna, sananyń ashyqtyǵyna jáne Qazaqstannyń evoliýtsiialyq damýyna baǵyttalǵan 12 arnaiy jobaǵa toptastyrylǵan.
Q.Kósherbaev ótken jyldy qorytyndylaý barysynda qazaqstandyq biznestegi áleýmettik jaýapkershiliktiń aitarlyqtai artqanyn atap ótti. 2019 jyly tek qana «Týǵan jer» jobasynyń aiasynda demeýshilerdiń kómegimen 60 mlrd. teńge 1520 áleýmettik infraqurylym nysandarynyń qurylystary men qaita jóndeý jumystaryna jumsalǵan. Onyń ishinde mektepter, balabaqshalar, sport alańdary, mádeni jáne meditsinalyq mekemeler bar.
«Arhiv-2025» is-sharalarynyń keshendi jospary qabyldandy. Memleket basshysynyń tapsyrmasymen latyn grafikasyndaǵy jańa qazaq álipbiin jetildirý jumystary júrip jatyr.
«Qazaq tilindegi 100 jańa oqýlyq» arnaiy jobasynyń aiasynda 17 jumys toby qurylyp, álemdegi tańdaýly kitaptardy irikteý men aýdarý jumystary júieli túrde uiymdastyryldy. «Qazaqstannyń kieli geografiiasy» arnaiy jobasyn iske asyrý arqyly respýblikalyq mańyzy bar 48 eskertkishke ǵylymi qaita qalpyna keltirý jumystary jasaldy. «Qazaqstannyń 100 jańa esimi» jobasy sheńberinde jyl saiyn qoǵamnyń úzdik ókilderi tańdalyp keledi.
Sonymen qatar Memlekettik hatshy baǵdarlamany iske asyrýdyń keibir baǵyttaryna erekshe nazar aýdarý qajettigin atap ótti. Sonyń ishinde, tulǵalyq damý, pragmatizm, ulttyq biregeilikti saqtaý jáne memleket pen qoǵamnyń damýy «halyq únine qulaq asatyn memleket» tujyrymdamasy aiasynda júzege asyrylýy kerek.
«Rýhani jańǵyrý» baǵdarlamasynyń basym baǵyttary boiynsha barlyq óńirlerde jumysty jandandyrý qajettigine erekshe ekpin berilip, jáne onyń oryndalýy Qazaqstan Respýblikasy Prezidenti Ákimshiliginiń baqylaýynda bolatyny aityldy.
.jpeg)