Qazaqstan Respýblikasynyń Memlekettik hatshysy Qyrymbek Kósherbaevtyń tóraǵalyǵymen Shetelde kadrlar daiarlaý jónindegi respýblikalyq komissiianyń kezekti otyrysy ótti, dep habarlaidy "Ult aqparat" Aqordaǵa silteme jasap.
Komissiia sheshimimen «Bolashaq» halyqaralyq stipendiiasy magistratýra, doktorantýra, rezindentýra boiynsha oqýdan ótetin, sondai-aq álemniń jetekshi ǵylymi jáne óndiristik ortalyqtaryna taǵylymdamadan ótýge jiberiletin 196 úmitkerge berildi.
Otyrysta bilim jáne ǵylym ministri Ashat Aimaǵambetovtiń Shetelde kadrlar daiarlaý jónindegi respýblikalyq komissiia hattamalyq tapsyrmalarynyń oryndalýy týraly esebi tyńdaldy, sondai-aq «Bolashaq» halyqaralyq stipendiiasyn iske asyrýǵa qatysty birqatar máseleler qaraldy.
2021 jyly «Bolashaq» baǵdarlamasy boiynsha oqýǵa 1055 stipendiia bólindi. Onyń ishinde 555 stipendiia magistratýra, rezidentýra, doktorantýra, taǵylymdama baǵdarlamalary boiynsha bólingen. Taǵy 500 stipendiia «Ǵalymdar» taǵylymdamasynyń jańa sanaty boiynsha berildi. Bul sanat Prezident Qasym-Jomart Toqaevtyń tapsyrmasyna sáikes, álemniń jetekshi ǵylymi ortalyqtarynda jyl saiyn 500 ǵalymnyń taǵylymdamadan ótýin qamtamasyz etý maqsatynda bekitilgen.
«Bolashaq» halyqaralyq stipendiiasyn taǵaiyndaý konkýrsyna qatysý úshin qujattardy qabyldaý osy jylǵy 4 mamyrdan 28 qazanǵa deiin jalǵasady.
Otyrys qorytyndysy boiynsha Qyrymbek Kósherbaev birqatar naqty tapsyrmalar berdi.
