BUU 6 tiline aýdarylǵan qazaq ádebietiniń antologiialaryn alǵan 100 jýyq eldiń belgili tulǵalary men uiymdarynan alǵys hat keldi. Bul týraly QR Memlekettik hatshysy Qyrymbek Kósherbaev aitty, dep habarlaidy QazAqparat tilshisi.
«Antologiialardy alǵan kóp elde bul tartýymyzdy shynaiy halyqtyq jáne mádeni diplomatiianyń biik úlgisi dep tanyp alǵystaryn aityp jatyr. Jaqynda Memleket basshysy Qasym-Jomart Toqaevtyń atyna Frantsiia Prezidenti Emmanýel Makron, Ulybritaniia Bilim ministri Gevin Ýiliamson siiaqty kóptegen eldiń memleket qairatkerlerinen, álemniń iri oqý oryndary men kitaphana basshylarynan 100-ge jýyq alǵys hat keldi», - dedi Qyrymbek Kósherbaev búgin Almatyda ótken jiyn barysynda.
Onyń aitýynsha, qazaq ádebietiniń antologiialary iri kitaphana qorlary men ondaǵy erekshe kitaptardy esepke alatyn WorldCat dep atalatyn halyqaralyq bibliografiialyq júiege endi.
Sonymen qatar, aǵylshyn tilindegi aýdarmaǵa atsalysqan Kembridj ýniversiteti baspasynyń usynysy boiynsha bul antologiialar Londonda ótetin Halyqaralyq kitap kórmesi aiasynda aýdarma ádebieti baiqaýyna túsip jatyr. Baiqaýdyń nátijesi naýryz aiynda jariialanady.
Qala ákimi Baqytjan Saǵyntaevtyń aitýynsha, kópshilikke usynylǵan eńbekter kásibi mamandardyń joǵary baǵasyna ie boldy.
«Búgin eldiń nazaryna usynylyp otyrǵan eńbekter elimizde ǵana emes, shet elderdiń de kásibi mamandarynyń joǵary baǵasyna ie bolypty. Máselen, Servantes institýtynyń jetekshisi Rosa Leon «bul jinaqtardyń jaryq kórýi – mádenietter sabaqtastyǵynda zor mánge ie» dedi. Al «Mishel de Mol» baspa úiiniń bas redaktory, belgili frantsýz lingvisi, aqyn Terri-de-la-Krýa «Antologiia – qazaq elin álemge tanytýda zor jetistikterge jetti, oqyrmandarymyz kóbeie tústi» dep habarlady. Munyń barlyǵy da mádeni ómirimizdegi zor tabystar dep oilaimyn», - dedi Baqytjan Saǵyntaev.
Aita ketý kerek, búgin Almatyda BUU 6 tiline aýdarylǵan qazaq prozasy men poeziiasynyń antologiialarynyń 120 myń danamen basylyp shyǵyp álemdik oqyrmanǵa jol tartýyna bailanysty mádeni shara ótti.
