QR Memlekettik hatshysy Qyrymbek Kósherbaev «Rýhani jańǵyrý» baǵdarlamasyn júzege asyrý aiasynda aimaq basshylary qandai máselege nazar aýdarýy kerektigin aitty, dep habarlaidy QazAqparat.
«Biz aýdandardyń da, qalalardyń ákimderin saiasi qyzmetker mártebesine qaityp ákeldik. Qoǵamdyq sanany jańǵyrtý – úlken saiasi másele. Ákimder óńirlerdegi saiasi, áleýmettik-ekonomikalyq damýyna jaýapty. Saiasi jetekshilik jasaisyzdar. Al mynaý úlken saiasi jumys. Aita keteiin, Memleket basshysynyń bizge jaqynda bergen tapsyrmasyna sáikes, ulttyq ideologiia máselelerin odan ary jetildirý boiynsha ózimizdiń usynystarymyzdy daiyndap jatyrmyz. Bul ortaq úlken jumys. Biz ekonomika alda, saiasi másele keiin» degen kezeńnen óttik. Qazir ekonomikalyq ta, rýhani da, saiasi da máseleler birdei qatar júrýi kerek. Ol týraly Memleket basshysy Qasym-Jomart Toqaev halyqqa arnaǵan Joldaýynda naqty aityp kórsetti», - dedi Memlekettik hatshy.
Qyrymbek Kósherbaev ministrler men ákimder osy jumystyń aldynda júrýi kerektigin eske saldy.
«Munda baǵdarlama sheńberinde keleńsiz kórinisterdi shekteý týraly pikirler aityldy. Alaida quqyqtyq memleket qaǵidaty sheńberinde bul jaittardy shekteý qanshalyqty nátije beretinin saraptaýymyz kerek. Búgingi tańdaǵy toi - ulttyq salt-dástúrdiń saltanat quratyn, urpaq ulaǵat alatyn, óner, mádeniet, tárbie kóretin ónegeli sharalar bolsa deimiz. Biz Naýryz merekesiniń qarsańynda turmyz ǵoi. Batysta kórisý degen jaqsy dástúr bar. Onda qystygúni eshkim eshqaida qatynai almaidy ǵoi. Qar eri bastaǵannan keiin jer qaraiǵanda jastar jinalyp, aqsaqaldardyń batasyn alady. Osy sebepti 14 naýryzǵa taiaý Amal merekesin keńinen atap, 22-24 naýryzda Naýryz merekesin toilaýǵa bailanysty biz de ózimizdiń usynysymyzdy beremiz. Ulttyq dástúrlerimizdi eldiń basyn biriktirýge durys paidalanýymyz kerek», - dedi ol.
Eske sala ketsek, Memlekettik hatshy Qyrymbek Kósherbaevtyń tóraǵalymen Aqordada búgin QR Prezidenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komissiianyń otyrysy ótkizildi.
.jpeg)