Búgin Saiasi qýǵyn-súrgin qurbandaryn eske alý kúninde Qazaqstan Respýblikasynyń Memlekettik hatshysy, Saiasi qýǵyn-súrgin qurbandaryn tolyq aqtaý jónindegi memlekettik komissiianyń tóraǵasy Qyrymbek Kósherbaev memlekettik komissiia múshelerimen birge «Otan satqyndary áielderiniń Aqmola lageri» (ALJIR) murajai-memorialdyq kesheniniń eske alý qabyrǵasyna gúl shoqtaryn qoidy, dep habarlaidy "Ult aqparat".
Rásimge qatysýshylar saiasi qýǵyn-súrgin jáne asharshylyq qurbandaryn «bir minýt únsizdikpen» eske aldy.
Sondai-aq saiasi qýǵyn-súrgin jáne asharshylyq qurbandaryn «bir minýt únsizdikpen» QR Premer-Ministriniń orynbasary Eraly Toǵjanov, QR Prezidenti ákimshiligi basshysynyń birinshi orynbasary Dáýren Abaev, «Nur Otan» partiiasy tóraǵasynyń birinshi orynbasary Baýyrjan Baibek, Aqmola oblysynyń ákimi Ermek Marjyqpaev eske aldy.
Murajai-memorialdyq keshendi aralaý barysynda Q.Kósherbaev murajaidyń ǵylymi-izdestirý jáne ekspeditsiialyq jumysyna erekshe nazar aýdaryp, áigili ALJIR lageriniń tutqyndaryn aqtaý Memlekettik komissiianyń respýblika aýmaǵyndaǵy lagerlerde bolǵan jazyqsyz qýǵyn-súrginge ushyraǵandardy, sondai-aq olardyń otbasy múshelerin aqtaýmen ainalysatyn jumys toptarynyń mindetine kiretinin atap ótti.
Memlekettik hatshy atap ótkendei, Memleket basshysy Q.K.Toqaevtyń bastamasymen qurylǵan memlekettik komissiianyń qyzmeti tarihty zerdeleý men arhivtik zertteýler júrgizý jónindegi keshendi jumystyń negizinde júzege asyrylady.
Memlekettik komissiianyń qyzmetin uiymdastyrý sheńberinde jobalyq ofis, eki kishi komissiia, 11 jumys toby jáne 17 óńirlik komissiia qurylyp, jumys istep jatyr.
Jumys toptary men óńirlik komissiialardyń ǵalymdary jáne sarapshylary jabyq arhiv materialdaryna ruqsat alyp, belsendi zertteý jumysyna kiristi.
Onyń tiimdiligin qamtamasyz etý úshin bazalyq ádisnama bekitildi, jumys toptarynyń taqyryptyq josparlary qalyptastyryldy, jergilikti jerlerde arhiv qujattaryn izdeý jáne zerdeleý máseleleri boiynsha kezdesý ótkiziledi.
Qorytyndylai kele Memlekettik hatshy memlekettik komissiianyń qyzmeti, eń aldymen, jazyqsyz zardap shekken saiasi qýǵyn-súrgin jáne asharshylyq qurbandaryn máńgi este qaldyrý jáne tarihi ádilettilikti qalpyna keltirý jónindegi úlken tarihi missiia jáne aldyńǵy jáne bolashaq urpaqtar aldyndaǵy jaýapkershilik ekenin taǵy da eske saldy.
