Almaty zoobaǵynda Aqtaý qalasynan ákelingen Simba atty arystanǵa arnalǵan jańa qorshaýdyń resmi ashylýy ótti, dep habarlaidy QazAqparat.
Simbaǵa arnalǵan zamanaýi qorshaý «Snow Leopard Foundation» qorynyń qoldaýymen salyndy. Onyń jalpy aýdany 750 sharshy metrden asady. Ol úsh aimaqtan turady - ekspozitsiialyq syrtqy qorshaý, demalatyn aimaq jáne qysqy bólme.
Ekspozitsiialyq qorshaýǵa tabiǵi materialdar qoldanyldy. Qurylysshylar aǵash pen tasty paidalanǵan. Sonymen qatar, tereńdigi 1,5 metr basseiin salyndy. Munyń bári jyrtqysh ań ózin jaqsy sezinýi úshin jasalǵan.
Qorshaý qurylysy qyzmetkerler men qonaqtardyń qaýipsizdigin barynsha eskere otyryp, halyqaralyq zoobaqtar qaýymdastyǵynyń standarttaryna sáikes júrgizilgen.
«Bárimiz de aqtaýlyq arystannyń ómirine alańdadyq jáne Simbany qutqaryp qaldyq. Onyń endi óz úii bar. Qorshaýdy zaman talabyna sai salǵanymyzǵa óte qýanyshtymyz»,–deidi «Snow Leopard Foundation» qorynyń ókili Nuráli Áliev.
Jańa jyldan bastap Simba haiýanattar baǵynyń menshigine beriledi. Veterinar mamandardyń aitýynsha, arystannyń densaýlyǵy jaqsy, ol keń ári yńǵaily jańa orynǵa aýysýǵa daiyn.
«Simba aitarlyqtai ósti jáne ol jasyna sai salmaq qosty. Ol birneshe ai boiy bizdiń karantin statsionarynda boldy. Osy ýaqyt ishinde biz keshendi meditsinalyq tekserýden ótkizdik», - deidi zoobaq veterinary Alina Chimirýk.
Eske sala keteiik, 25 maýsymda Mańǵystaý oblysynyń Aqshuqyr aýylynyń jergilikti turǵyndary kóshede júrgen arystandy kórip, dabyl qaqqan bolatyn.
10 shildede jyrtqysh janýardy zańsyz asyraǵan Aqtaý turǵynyna sot úkimi shyqty. Sol ai da Simba Almatyǵa jetkizildi.
