Jýyrda «Mazmundama» qorynyń tóraǵasy, «KazPetroDrilling» kompaniiasynyń vitse-prezidenti, Garvard ýniversitetiniń túlegi, jýrnalist Shyńǵys Muqan «Kóshbasshylyq» atty jańa kitap shyǵardy.
Kitapqa kóshbasshylyq taqyrybyn zerttegen aitýly ǵalymdardyń tańdamaly on týyndysy engen. Álemdik suranysqa ie, oqyrmandar qyzyǵýshylyǵyn týdyrǵan úzdik shyǵarmalar suryptalyp, kitaptyń negizgi ózegi, ideiasy mazmundalǵan.
Jinaq Ýorren Bennistiń «Kóshbasshy bolý haqynda» atty kitabymen bastalyp, Piter Drýkerdiń «Tiimdi basshy» týraly týyndysymen jalǵasady. Sondai-aq jinaqqa Deniel Goýlman, Richard Boiatsis jáne Enni MakKidiń «Emotsionaldy kóshbasshylyq», Djon Kotterdiń «Ózgeristiń aldynda bol», Ronald Haifetstiń «Kúrmeýi qiyn kóshbasshylyq», Djeims Kýzes pen Barri Poznerdiń «Kóshbasshylyq synaǵy», Djim Kollinzdiń «Jaqsydan – jasampazdyqqa», Bill Djordj ben Piter Simstiń «Durys baǵyt», Saimon Sinektiń «Nege» degen suraqtan basta», Din Ýiliamstiń «Naǵyz liderlik» kitaptary engen. Sammari úlgisinde jasalǵan týyndy 3 myń danamen qazaq jáne orys tilderinde jaryq kórip otyr. Kitap «Meloman» kitap dúkenine satylymǵa tústi.
«Mazmundama degenimiz – kitaptyń basty ideialaryna sholý. Bizdiń mazmundama sizge ne beredi? Birinshiden, álem oishyldarynyń qundy ideialarymen tanysýǵa múmkindik beredi. Biz iriktegen ár kitaptyń avtory – qoǵamdyq-áleýmettik salany zerdeleýge ómirin sarp etken jandar. Ekinshi –ýaqyt únemdeý. Eki-úsh kún oqityn kitaptyń negizgi oiyn jarty saǵat ishinde meńgerýge bolady. Bizdiń mazmundama jinaǵyn 14 jastan asqan jasóspirim oqi alady. Munda qazaqsha, oryssha jáne aǵylshynsha myńǵa jýyq sózdiń aýdarmasy berilgen. Tikelei aýdarma emes. Sózdiń maǵynasyn aýdarýǵa tyrystyq. Iaǵni oqyrman kitapty oqyp qana qoimai, sózdik qoryn da baiytady», - deidi jinaq qurastyrýshysy Shyńǵys Muqan.
Aita ketsek, «Mazmundama» qoǵamdyq qory tanymdyq mańyzy zor kitaptardy qysqa da nusqa formatta mazmundap, qundy ideialardy oqyrmandarǵa jetkizý maqsatynda Top-10 seriiasyn bastady. Aldaǵy ýaqytta otbasy, saiasat, kemeldený, ózin-ózi damytý sekildi taqyryptarda jalǵasyn taýyp, tańdamaly on týyndy kópshilik nazaryna usynylady.
Eske salaiyq, 7 qyrkúiek kúni Almaty arbatynda «KITAP FEST» kitap festivali aiasynda «Kóshbasshylyq» kitabynyń tanystyrylymy ótedi. Bastalýy – saǵat 11:00-de.
