Májilis tóraǵasy Erlan Qoshanov politsiiany qoldaý boiynsha Prezident tapsyrmalaryn jedeldetip oryndaýǵa qatysty usynys engizdi, dep habarlaidy QazAqparat tilshisi.
Atap aitqanda, búgin Májilistiń jalpy otyrysynda «Qazaqstan Respýblikasynyń keibir zańnamalyq aktilerine quqyq qorǵaý qyzmetin ótkerý tártibin jetildirý máseleleri boiynsha ózgerister men tolyqtyrýlar engizý týraly» zań jobasy birinshi oqylymda qaralyp, maquldandy.
«Zań jobasynda (búgin Májiliste qaralǵan «Qazaqstan Respýblikasynyń keibir zańnamalyq aktilerine quqyq qorǵaý qyzmetin ótkerý tártibin jetildirý máseleleri boiynsha ózgerister men tolyqtyrýlar engizý týraly» zań jobasy) kadrlyq másele, quqyq qorǵaý organdaryn materialdyq qamtamasyz etý máseleleri, sondai-aq áleýmettik qorǵaý baǵyttary qaralǵan. Biraq qańtardaǵy qaiǵyly oqiǵada quqyq qorǵaý organdarynyń fýnktsiialary jáne ókilettiligi zańnamalyq jaǵynan jetkiliksiz rettelgeni baiqaldy. 11 qańtarda Prezident Májilis otyrysynda sóilegen sózinde úsh blok boiynsha zańdarǵa túzetýler engizý týraly tapsyrma bergen bolatyn. Birinshisi, qarý-jaraq ainalymyna qatysty qoiylatyn talaptardy qatańdatý edi. Ekinshisi, bilik ókilderine shabýyl jasaǵany jáne zańdy talaptarǵa baǵynbaǵany úshin jaýapkershilikti kúsheitý máselesi. Úshinshisine toqtalsaq, kúshtik qurylymdardyń sheshim qabyldaý kezindegi derbestigi, basshylardyń jaýapkershiligi. Sodan beri bir ai ótti, osy oraida zań jobasy qaida? Májilistiń qaraýyna qashan engiziledi?», - dep surady Qoshanov.
Óz kezeginde QR Bas prokýrorynyń orynbasary Áset Shyndaliev tiisti zań jobalary ázirlengenin, onyń bireýin Ishki ister ministrligi, al ekinshisin Bas prokýratýra daiarlaǵanyn jetkizdi.
«Qazir zań jobalary ókiletti organdarda kelisýde jatyr. Ol qujattar boiynsha tiisti jumystar atqarylyp jatyr, jaqyn arada Parlmentke joldaimyz... Bekitilgen jospar boiynsha maýsym aiy belgilengen, biraq biz jumystardy tezdetip jatyrmyz», - dedi Shyndaliev.
Bul jaýapqa qatysty Májilis tóraǵasy tiisti usynys jasady.
«Sizder sáýirde nemese maýsymda (zań jobalaryn) engizesizder. Ol odan keiin qyrkúiek aiynda jalpy otyrysta qarala bastaidy. Sodan keiin Senattyń talqylaýyna engizilip, jyldyń aiaǵyna deiin jalǵasady. Sonda, Prezidenttiń tapsyrmasyn bir jyl ýaqytta oryndaimyz. Iaǵni bul másele bir jyldyń ishinde ózekti bola ma?! Oǵan deiin qandai oqiǵalar bolýy múmkin? Sondyqtan tiisti usynysty jasaimyn. Búgingi zań jobasyn birinshi oqylymda qarap otyrmyz, endi ekinshi oqylymǵa deiin tiisti ózgertýler men tolyqtyrýlardy engizińizder. Ekinshi oqylymda osy zańnyń ishinde atalǵan máselelerdi birge qarap jiberý kerek. Sonda, Memleket basshysynyń tapsyrmalaryn jedel oryndaýǵa jaǵdai jasalady», - dedi Qoshanov.
«Ekinshi oqylymǵa deiin tiisti túzetýlerdi daiyndaý kerek. Politsiiany, quqyq qorǵaý organdaryn moraldyq turǵydan bolsyn qoldaýymyz kerek. Olar eki túrli shabýylǵa ushyrap otyr. Birinshiden, qańtar aiyndaǵy tártipsizdik kezinde shabýylǵa tap bolsa, ekinshiden, aqparattyq shabýylǵa ushyrap otyr. Al kerek kezinde bizdi qorǵaityn osy politsiia qyzmetkerleri. Sondyqtan biz bul suraqty jedeldetip, osy zań jobasyn tezirek qabyldap, Prezidenttiń tapsyrmasyn oryndaýymyz kerek», - dedi Májilis tóraǵasy.
