Búgin Májilis Spikeri Erlan Qoshanovtyń tóraǵalyǵymen palata biýrosy ótti. Otyrysty ashqan Májilis tóraǵasy depýtattardyń sailaýshylarmen kezdesýi úshin óńirlerge saparǵa shyǵýy týraly aitty, dep habarlaidy "Ult aqparat" tómengi palatanyń resmi saityna silteme jasap.
Alda turǵan jumystyń mańyzdyǵyna toqtalǵan Erlan Qoshanov óńirlerge saparlar jańartylǵan formatta uiymdastyrylýy tiis ekenin alǵa tartyp, depýtattar ózderi jaqsy biletin, eń bastysy, ózderin qabyldaityn jáne maqsatty aýditoriiasy bar aimaqtarǵa barýy kerektigin jáne halyqpen kezdesýleri tek oblys ortalyqtary men iri qalalarda ǵana emes, aýyldyq jerlerde de ótkizilýi qajettiligin atap ótti.
Sondai-aq, Májilis tóraǵasy depýtattardyń basty nazarynda, Memleket basshysy Qasym-Jomart Toqaevtyń jańa bastamalary, onyń ishinde, jýyq arada ǵana ótken qaiǵyly oqiǵalar saldarynan eldegi áleýmettik-ekonomikalyq jaǵdaidy turaqtandyrý týraly bolatynyn aitty.
Odan ári Májilistiń biýro otyrysy barysynda depýtattar talqylaýyna quqyq qorǵaý qyzmetin ótkerý tártibin jetildirý máseleleri boiynsha ózgerister men tolyqtyrýlar engizý týraly zań jobasyn I oqylymda qaraý usynyldy.
Jumys barysynda depýtattar birqatar túzetýler engizdi. Atap aitqanda, quqyq qorǵaý qyzmetkerleriniń eńbegine aqy tóleý, olardyń áleýmettik jáne quqyqtyq qorǵalýyn arttyrý, sondai-aq, zeinetaqymen qamtamasyz etýge, quqyq qorǵaý organdary qyzmetkerleriniń turǵyn úi qatynastaryn retteý erekshelikterine qatysty máseleler qarastyrylǵan.
Sonymen qatar biýro otyrysynda Májilis tóraǵasy Erlan Qoshanov Palata Apparatynyń jańa basshysy Renat Qurmetjanuly Aitaevty tanystyrdy. Ol buǵan deiin Qazaqstan Respýblikasy Ákimshilik basshysy hatshylyǵynyń meńgerýshisi qyzmetin atqarǵan.
