Qazaqstannyń kólik politseileri qos azamattyǵy bar Túrkiia azamatyna 600 myń teńgege jýyq aiyppul saldy, dep habarlaidy "Ult aqparat" Kóliktegi politsiia departamentiniń baspasóz qyzmetine silteme jasap.
Jedel-aldyn alý is-sharasyn ótkizý barysynda Almaty qalasynyń áýejaiyndaǵy Jelilik politsiia bóliminiń qyzmetkerleri Qazaqstan Respýblikasynyń azamattyq týraly zańnamasyn buzǵan Túrkiia azamatshasyn anyqtap, ustady.
Tekserý barysynda kólik politseileri «Stambýl-Almaty» baǵytyndaǵy áýe reisimen ushyp kelgen Qazaqstan men Túrkiianyń azamattyǵy bar 32 jastaǵy áieldi ákimshilik jaýapqa tartty.
Oǵan qatysty QR ÁQBtK-niń 496-babynyń 2-bóligimen, iaǵni Qazaqstan Respýblikasynyń zańnamasynda belgilengen merzimde shetel azamattyǵyn alý faktisin habarlamaý boiynsha ákimshilik hattama toltyryldy.
«Almaty qalasynyń mamandandyrylǵan aýdanaralyq ákimshilik sotynyń sheshimimen Túrkiia azamatyna 200 AEK mólsherinde (583 400 teńge) aiyppul túrindegi ákimshilik jaza taǵaiyndaldy»,-delingen habarlamada.
Eske sala keteiik, biylǵy jyldyń basynan beri Kóliktegi Politsiia departamentiniń qyzmet kórsetý aýmaǵynda QR Halyqtyń kóshi-qony salasyndaǵy zańnamasyn buzǵan 124 azamat ákimshilik jaýapqa tartyldy, onyń ishinde 6 azamat qos azamattyǵy bar tulǵalar (Resei-3, Túrkiia-2, AQSh-1).
Sondai-aq, sot qaýlylarymen 26 sheteldik azamat elden tysqary shyǵarylyp, olardyń barlyǵyna 5 jylǵa deiin elge kirýge tyiym salyndy.
