Aqmola oblysynda kórshisin uryp óltirgen 37 jastaǵy er adam ustaldy, dep habarlaidy "Ult aqparat" oblystyq politsiia departamentiniń baspasóz qyzmetine silteme jasap.
Vedomstvonyń málimetinshe, 2021 jylǵy mamyrdyń 11-de saǵat 07:07 shamasynda Kókshetaý qalalyq politsiia basqarmasy jedel basqarý ortalyǵynyń «102» pýltine 37 jastaǵy jergilikti turǵyn habarlasyp, óz páteriniń jatyn bólmesinen kórshisiniń denesin tapqanyn aitqan.
Er adamnyń sózinshe, kórshisi oǵan shai surap kelgen. Sol kezde onda dene jaraqattary bolǵan. Tańerteń oianǵanda er adamnyń kóz jumǵanyn kórip, birden politsiiaǵa habarlasýdy sheshken.
Oqiǵa ornyna barǵan tártip saqshylary 53 jastaǵy er adam túngi saǵat bir shamasynda kóptegen jaraqattardan qaitys bolǵanyn anyqtady.
Meditsinalyq saraptamanyń qorytyndysyna sáikes, er adam «bastyń, keýdeniń, ishtiń ishki aǵzalardyń zaqymdalýy, baýyrdyń jyrtylýy jáne travmatikalyq shoktyń» saldarynan kóz jumǵan.
«Jedel-izdestirý sharasynda politsiia politsiiaǵa habarlasqan 37 jastaǵy jergilikti turǵynnyń osy qylmysqa qatysy baryn anyqtady. Er adam jasaǵan qylmysyn tolyq moiyndady. Ol ishimdik ishý barysynda týyndaǵan janjal kezinde kórshisin uryp, keiin tósegine jatýǵa ketip qalǵan. Tek tańerteń kórshisiniń ólgenin anyqtady. Er adamǵa qatysty Qylmystyq kodekstiń 99 babynyń 1 bóligi «Adam óltirý» boiynsha sotqa deiingi tergeý sharalary júrgizilýde. Kúdikti ýaqytsha ustaý oqshaýlaǵyshyna toǵytyldy», - dedi vedomstvodan.
