QR Shekara qyzmetiniń direktory Darhan Dilmanov shekaradan zańsyz ótken Qytai azamattary Murager Álimuly men Qaster Musaqanǵa qatysty túsinik berdi, dep habarlaidy QazAqparat.
Darhan Dilmanovtyń sózine qaraǵanda, tergeý amaldarynan keiin shekaradan zańsyz ótý faktisi boiynsha sot bolady. Atalǵan azamattarǵa qatysty budan basqa aiyp taǵylyp otyrǵan joq. Bul kúdiktilerge bir jyl bas bostandyǵynan aiyrý nemese shartty jaza da qoldanylýy múmkin.
«Memlekettik shekarany buzý Shyǵys Qazaqstan oblysy Zaisan shekara otriady ýchaskesinde tirkeldi. Qytai azamattary shekarany zańsyz qiyp ótken jerdi ózderi kórsetti. Biz osy málimetterdi tirkedik, sol jerde anyqtalǵan zattai aiǵaqtar da bar. Olar bul zattar ózderine tiesili bolǵanyn rastady», - dedi D. Dilmanov.
Mundai jaǵdai óte sirek kezdesetinine toqtalǵan ol, «memlekettik shekara óte berik ekenin atap ótkim keledi. Bul turǵyda adami faktor oryn alýy múmkin. Sáikesinshe, biz tiisti tekserýdi júrgizip jatyrmyz. Osy oraida memlekettik shekarany kúzetý boiynsha keibir qadamdardy ózgertemiz.
Onyń aitýynsha, atalǵan oqiǵadan Qazaqstan Shekara qyzmeti qyzmettik tekserý júrgizdi.
«Tiisti tekerý júrgizildi, barlyǵy tiisti jazasyn alady. Laýazym ieleri jazaǵa tartylady. Olar qatardaǵy sarbazdar emes, iaǵni laýazymdy adamdar. Osy oraida shekara beketiniń basshysy, shekara komendatýrasynyń komendanty bar. «Zaisan» bóliminiń komandiri qyzmetinen shettetildi», - dedi D. Dilmanov.
Budan buryn habarlanǵandai, 10 qazanda Qytai azamattary Murager Álimuly men Qaster Musaqanǵa qatysty QR Qylmystyq kodekstiń 392-baby 1-bóliginde qarastyrylǵan «Qazaqstan Respýblikasynyń Memlekettik shekarasyn qasaqana zańsyz ótý» boiynsha sotqa deiingi tekserý bastaldy.
