قر شەكارا قىزمەتٸنٸڭ ديرەكتورى دارحان دٸلمانوۆ شەكارادان زاڭسىز ٶتكەن قىتاي ازاماتتارى مۇراگەر ەلٸمۇلى مەن قاستەر مۇساقانعا قاتىستى تٷسٸنٸك بەردٸ, دەپ حابارلايدى قازاقپارات.
دارحان دٸلمانوۆتىڭ سٶزٸنە قاراعاندا, تەرگەۋ امالدارىنان كەيٸن شەكارادان زاڭسىز ٶتۋ فاكتٸسٸ بويىنشا سوت بولادى. اتالعان ازاماتتارعا قاتىستى بۇدان باسقا ايىپ تاعىلىپ وتىرعان جوق. بۇل كٷدٸكتٸلەرگە بٸر جىل باس بوستاندىعىنان ايىرۋ نەمەسە شارتتى جازا دا قولدانىلۋى مٷمكٸن.
«مەملەكەتتٸك شەكارانى بۇزۋ شىعىس قازاقستان وبلىسى زايسان شەكارا وتريادى ۋچاسكەسٸندە تٸركەلدٸ. قىتاي ازاماتتارى شەكارانى زاڭسىز قيىپ ٶتكەن جەردٸ ٶزدەرٸ كٶرسەتتٸ. بٸز وسى مەلٸمەتتەردٸ تٸركەدٸك, سول جەردە انىقتالعان زاتتاي ايعاقتار دا بار. ولار بۇل زاتتار ٶزدەرٸنە تيەسٸلٸ بولعانىن راستادى», - دەدٸ د. دٸلمانوۆ.
مۇنداي جاعداي ٶتە سيرەك كەزدەسەتٸنٸنە توقتالعان ول, «مەملەكەتتٸك شەكارا ٶتە بەرٸك ەكەنٸن اتاپ ٶتكٸم كەلەدٸ. بۇل تۇرعىدا ادامي فاكتور ورىن الۋى مٷمكٸن. سەيكەسٸنشە, بٸز تيٸستٸ تەكسەرۋدٸ جٷرگٸزٸپ جاتىرمىز. وسى ورايدا مەملەكەتتٸك شەكارانى كٷزەتۋ بويىنشا كەيبٸر قادامداردى ٶزگەرتەمٸز.
ونىڭ ايتۋىنشا, اتالعان وقيعادان قازاقستان شەكارا قىزمەتٸ قىزمەتتٸك تەكسەرۋ جٷرگٸزدٸ.
«تيٸستٸ تەكەرۋ جٷرگٸزٸلدٸ, بارلىعى تيٸستٸ جازاسىن الادى. لاۋازىم يەلەرٸ جازاعا تارتىلادى. ولار قاتارداعى ساربازدار ەمەس, ياعني لاۋازىمدى ادامدار. وسى ورايدا شەكارا بەكەتٸنٸڭ باسشىسى, شەكارا كومەنداتۋراسىنىڭ كومەندانتى بار. «زايسان» بٶلٸمٸنٸڭ كومانديرٸ قىزمەتٸنەن شەتتەتٸلدٸ», - دەدٸ د. دٸلمانوۆ.
بۇدان بۇرىن حابارلانعانداي, 10 قازاندا قىتاي ازاماتتارى مۇراگەر ەلٸمۇلى مەن قاستەر مۇساقانعا قاتىستى قر قىلمىستىق كودەكستٸڭ 392-بابى 1-بٶلٸگٸندە قاراستىرىلعان «قازاقستان رەسپۋبليكاسىنىڭ مەملەكەتتٸك شەكاراسىن قاساقانا زاڭسىز ٶتۋ» بويىنشا سوتقا دەيٸنگٸ تەكسەرۋ باستالدى.
