Elordanyń ýrbanistika ortalyǵy «Qorshaýsyz qala» tujyrymdamasyn júzege asyrmaq. Bul jaiynda Nur-Sultan qalalyq sáýlet, qala qurylysy jáne jer qatynastary basqarmasynyń baspasóz qyzmetinen málim etti, dep habarlaidy "ULt aqparat".
Basqarma málimetinshe, bul qalanyń qoǵamdyq oryndarynyń bárinen qorshaýlardyń alynyp tastalatynyn bildiredi. Usynylǵan aqparatqa qaraǵanda, belsendiler aýdandyq ákimdiktiń ókilderimen jáne túrli nysan ielerimen kelissóz júrgizip, qorshaýlardy alyp tastaý kelisimine qol jetkizgen.
Bul qalada ashyq ári dos peiildi orta qurýǵa múmkindik beredi. Negizgi maqsat - jaiaý júrginshiler men velosiped tebýshiler úshin qorshaýsyz qoǵamdyq keńistik qurý.
Ýrbanistika ortalyǵynyń jetekshisi Elnar Bazykenniń aitýynsha, búgingi kúnge deiin Jeruiyq saiabaǵynyń qorshaýy alynyp tastalǵan.
Aldaǵy ýaqytta dál osyndai jumys L.Gýmilev atyndaǵy Eýraziia ulttyq ýniversiteti tóńireginde jáne barlyq shaǵyn aýdandarda kezeń-kezeńimen júrgiziledi.
