Mańǵystaý oblysynyń mádeniet basqarmasy kinorejisser Qanat Mailybaevqa "Qudyq" atty jańa filmin kórsetýge tyiym saldy, - dep habarlaidy Tengrinews.kz.
Rejisserdiń aitýynsha, bastapqyda ol filmdi túsirip, kórsetýge Mańǵystaý oblysynyń ákimdiginen ruqsat alǵan. Biraq premeraǵa eki kún qalǵanda, 11 aqpanda ákimdikten hat kelgen, onda filmde qatygezdik, zorlyq-zombylyq, oralmandardy qorlaý kórinisteri bar jáne oblysta kórsetýge tyiym salynǵany kórsetilgen.
"Premeraǵa deiin filmdi eshkimge kórsetpedim, ony eshkim kórmedi. Bul ádil emes, negizsiz. Olardy shaqyrsam da, jabyq kórsetilimde ákimdik ókilderi bolǵan joq. Filmdi kórmesten kórsetýge tyiym saldy. Men filmdi kórip, baǵa berý úshin komissiia jiberýdi ótindim. Buǵan qansha ýaqyt jumsadym. Mádeniet jáne aqparat ministrliginiń jaýabyn kútpesten, oblystyq ákimdik óz betinshe tyiym saldy. Bul jaǵdaidy anyqtaǵym keledi", - dedi rejisser.
Mailybaev QR Mádeniet jáne sport ministrligine prokat kýáligin alý úshin júgingen. Olar eki apta ishinde jaýap beretinin aitqan.
Al Mádeniet jáne sport ministrligi qujattardy tolyq usynbaǵandyqtan, (ótinish berýshiniń filmge nemese ony paidalaný quqyǵyn rastaityn qujattardyń elektron kóshirmeleri qosa berilmegen) rejisserge filmdi prokatqa shyǵarý kýáligin berýden bas tartylǵanyn atap ótti.
Shynaiy oqiǵalarǵa negizdelgen "Qudyq" dramasy 2020 jyly Mańǵystaý oblysynda túsirilgen. Filmde atajurtqa oralǵan qazaq pen jergilikti qyzdyń arasyndaǵy mahabbat hikaiasy baiandalady.
