Qazaqstanda qatań shekteý sharalary engizilgennen bastap, koronavirýspen syrtqattanýdyń táýliktik ósimi 0,5 paiyzǵa deiin tómendedi. Bul týraly QR Bas memlekettik sanitar dárigeri Aijan Esmaǵambetova aitty, dep habarlaidy "Ult aqparat".
«Qazirgi kezde koronavirýs infektsiiasy boiynsha epidemiologiialyq jaǵdaidyń turaqtaný úrdisi baiqalýda. Biylǵy 14 tamyzdaǵy málimet boiynsha, Qazaqstanda PTR oń nátije kórsetken koronavirýs infektsiiasynyń 101 848 jaǵdaiy tirkeldi», - dedi ol búgin Ortalyq kommýnikatsiialar qyzmetinde.
Osy oraida Esmaǵambetova bir táýlikte 476 adam koronavirýs indetimen aýyrǵany belgili bolǵanyn aitty.
Sonymen qatar, ótken táýlikte koronavirýs infektsiiasynyń belgileri bar pnevmoniianyń 934 jaǵdaiy tirkeldi.
«Qatań shekteý sharalary engizilgennen bastap syrtqattanýshylyqtyń táýliktik ósimi 0,5 paiyzǵa deiin tómendedi. Tirkelgen Covid-19 jaǵdailarynyń jalpy sanynyń 77 paiyzdan astamy emdelip, kúndelikti ómirge oraldy», - dedi QR Bas memlekettik sanitar dárigeri.
Budan buryn habarlanǵandai, 13 tamyzda QR Premer-Ministri Asqar Maminniń tóraǵalyǵymen ótken memlekettik komissiia otyrysynda qalyptasqan epidemiologiialyq jaǵdaidy eskere otyryp, Karantin sharalaryn kezeń-kezeńimen alyp tastaý jospary bekitildi.
