Elordada koronavirýstyń simptomsyz tasymaldaýshylary telemeditsina arqyly em alady. Bul týraly Nur-Sultan qalasynyń ákimi Altai Kólginov paraqshasynda jazdy, dep habarlaidy "Ult aqparat".
«Epidemiologiialyq jaǵdai men ótinish bildirýshiler sanynyń artýyn eskere otyryp, koronavirýstyń taralýyna qarsy is-qimyl jónindegi qalalyq shuǵyl áreket etý shtabynda birqatar máseleler qaraldy. Birinshi. Covid-19 infektsiiasyn juqtyrǵandar úshin qosymsha 400 provizorlyq oryn ashyldy. Onyń ishinde, statsionarlar bazasynda infarkt, insýlt, qant diabeti bar (KVI-ǵa kúdigi bar) adamdarǵa arnalǵan jeke oryndar anyqtaldy. Buǵan deiin pnevmoniia men ORVI bar emdelýshiler úshin jeke korpýstar ashylǵan bolatyn. Olardy koronavirýsqa qosymsha tekseredi. Bul infektsiiany erterek anyqtaýǵa múmkindik berdi», - dedi Altai Kólginov.
Ekinshiden, onyń aitýynsha, qalalyq jáne jeke menshik emhanalardyń bas dárigerlerimen, statsionarlardyń, taldaý-ortalyqtarynyń basshylarymen jáne qalanyń bas sanitarlyq dárigerimen onlain-kezdesýden keiin koronavirýstyń simptomsyz tasymaldaýshylaryn emdeý úshin telemeditsinaǵa kóshý týraly sheshim qabyldandy. Meditsina qyzmetkerleri beineqońyraýlar jáne basqa da bailanys arnalary arqyly turǵyndardyń densaýlyq jaǵdaiyn qadaǵalaidy, koronavirýstyń simptomsyz tasymaldaýshylaryna barlyq máseleler boiynsha keńes beredi. Naýqastarda simptomdar paida bolǵan jaǵdaida olar aýrýhanaǵa jatqyzylady.
Úshinshiden, shetelden ushyp kelgen áýejolaýshylardy oqshaýlaý tájiribesi jalǵasady. «Ramada Plaza» qonaq úiinde medstatsionarǵa jabdyqtalǵan nómirler daiyndaldy. 22 naýryzdan bastap qalaǵa kirý jáne shyǵý jabyldy, qalalyq shtab barlyq áýejolaýshylaryn tekserý týraly sheshim qabyldady. Bul qalaǵa infektsiia juqtyrǵandardy jibermeýge múmkindik berdi.
«Tórtinshiden uiymdar qyzmetkerlerdi qashyqtan jumys jasaý rejimine barynsha kóshirýi qajet. Qyzmeti ruqsat etilgen uiymdar sanitarlyq-epidemiologiialyq normalardyń qatań saqtalýyn baqylaýy kerek. Covid-19 juqtyrǵandardyń jartysy ártúrli ujymdar. Kún saiyn ákimdiktiń mobildi toby politsiia qyzmetkerlerimen, sanitarlyq dárigerlermen, volonterlermen birlesip reidter júrgizip jatyr. Tártipbuzýshylyq bolǵan jaǵdaida nysandar jabylady. Besinshiden, qala turǵyndary sanitarlyq normalardy qatań saqtaýy qajet. Maska kiip (ásirese adamdar kóp jinalatyn jerlerde), múmkindiginshe adam kóp jinalatyn oryndarǵa barmai, antiseptik paidalanyp, ara qashyqtyq saqtaǵan jón», - dedi qala basshysy.
