Taýarlar men kórsetiletin qyzmetterdiń sapasy men qaýipsizdigin baqylaý komitetiniń tóraǵasy Liýdmila Biýrabekova koronavirýs mamyr aiynda joǵalatyny týraly boljamǵa pikir bildirdi, dep habarlaidy QazAqparat.
Buǵan deiin birqatar BAQ koronavirýstyń ýltrafioletke tótep bere almaitynyn, sondyqtan mamyr aiynda tolyq joǵalatynyn jazǵan edi.
«Epidemiialyq jaǵdai boiynsha bul boljam qisynǵa kelmeidi. Suhbat bergen mamannyń ózi interviýdyń telefonmen júrgizilgenin, suraqty jańsaq túsingenin moiyndady. Sondyqtan osyndai boljam aitqan. Shyn máninde, biz de boljamdar jasap otyrmyz. Biraq sáýirde nemese mamyr aiynda dep naqty eshteńe aita almaimyz», - dep jaýap berdi L. Biýrabekova Ortalyq kommýnikatsiialar qyzmetinde tilshi suraǵyna.
Aita keteiik, qazirgi ýaqytta álemde COVID-19 virýsyn juqtyrǵandar sany 90 893 adam jáne odan 3110 adam qaitys boldy.
Sońǵy 48 saǵatta Qytaidan tysqary jerde tirkelgen 1848 naýqastyń 80%-y úsh elge tiesili: Iran, Italiia jáne Ońtústik Koreia.
