Aldaǵy birneshe aptanyń ishinde elimizdiń aýrýhanalaryna qosymsha ókpeni jasandy jeldetý apparattary jetkiziledi. Bul týraly QR Densaýlyq saqtaý ministri Aleksei Tsoi aitty, dep habarlaidy "Ult aqparat".
«Biz shamamen 5 myń ókpeni jasandy jeldetý apparatyn satyp alýdy josparlaǵan edik. Qazirgi ýaqytta jetkizilip te jatyr. Qazaqstan aýrýhanalarynda búginde 3 myńnan astam apparat ornatyldy. 1,5 myń apparatty otandyq óndirýshiler shyǵarǵan. Taiaý birneshe aptanyń ishinde barlyq apparat jetkiziletin bolady»,- dedi Aleksei Tsoi.
Onyń dereginshe, búginde elimizdiń aýrýhanalarynda koronavirýspen jáne ókpe qabynýymen shamamen 4,8 myń patsient em alyp jatyr.
«Qazir ahýal turaqty. Kórshiles elderde, ásirese Eýropa óńirinde, TMD elderinde aýrý ósimi baiqalady. Sondyqtan biz úshin osy ahýaldy ustap qalý óte mańyzdy. Kórsetkishter jaqsy bolǵanyna qaramastan tósek-oryn qoryn ulǵaityp, dári-dármek satyp alyp jatyrmyz. Jeke qorǵanys quraldarymen, maskamen qamtamasyz etemiz. Biz indettiń kelesi tolqynyna daiyndalýdamyz. Árine, biz úshin onyń bolmaǵandyǵy óte mańyzdy. Eń mańyzdy fakti – áleýmettik araqashyqtyq pen maska. Aýrdyń 30 paiyzy maska taǵýǵa jáne 40 paiyzy áleýmettik araqashyqtyqty saqtaýǵa bailanysty ekendigin birneshe márte aittyq. Osyny ustanýǵa shaqyramyz. Indet tolqynynyń bolýyna ne bolmaýyna biz ózimiz yqpal etemiz. Bizdiń árqaisymyz osynaý ahýalǵa yqpal ete alamyz. Qazir densaýlyq saqtaý júiesine kelesi tolqynǵa daiyndyq pen aldyn alý-túsindirý jumystary ǵana bailanysty. Al qalǵany bizdiń árqaisymyzǵa, jii qarym-qatynasta bolýymyzǵa, maska taǵýymyzǵa bailanysty ekendigi anyq», - dedi Aleksei Tsoi.
