Koronavirýsty anyqtaýda eń naqty nátije kórsetetin taldaý túri qandai? Ol qalai jasalady? Osy saýaldarǵa Almatydaǵy Medical Partners Korea Clinic Ońtústik Koreia emhanasynyń negizin qalaýshy Ǵalymjan Toǵyzbaev jaýap berdi, dep habarlaidy QazAqparat.
Búginde qaladaǵy 6 zerthananyń biri osy emhanada jumys istep tur. COVID-19 taldaýy kepildendirilgen memlekettik meditsinalyq kómek kólemi aiasynda tegin jasalady.
Spikerdiń aitýynsha, testileý ońtústikkoreialyq júiemen júrgiziledi. Onyń qazaqstandyq júieden aiyrmashylyǵy - molekýliarly diagnostika avtomatty túrde jasalady.
«Bul tehnologiiada RNQ ekstraktsiiasyn avtomat jasaidy. Al Qazaqstanda bul qolmen jasalady. Avtomat 90 taldaýdy bir mezette 99% dáldikpen kórsete alady. PTR reaktivter COVID-19 genin 1-1 den emes, 3-4 gendi birden anyqtaidy. Bul virýsty anyqtaý barynsha dál bolatynyn kórsetedi. Bir mezette tumaý virýsynyń 17 túrin, 6 túrli bakteriiany anyqtai alady. Álem boiynsha úzdik tehnologiiany Eýropa elderiniń 80%-y qoldanady», - dedi Ǵalymjan Toǵyzbaev.
Onyń aitýynsha, PTR taldaý koronavirýstyń birneshe molekýlasyn da anyqtai alady. Iaǵni, aýrý jańadan bastalyp kele jatqanda nemese sozylmaly jaǵdaida nemese baiqalmai jeńil ótkende de anyqtalady degendi bildiredi.
Qazir ońtústikkoreialyq emhanada kúnine 1300 test jasalyp jatyr. Jaqynda diagnostikany kúnine 2,5 myńǵa jetkizý kózdelgen.
PTR-taldaý DDU nusqaýlyǵy boiynsha murynnyń shyryshty qabatynan jaǵyndy alý arqyly jasalady.
«Muryn qýysynan alynǵan testide alǵashqy táýlikterdegi dáldik joǵary bolady. Óitkeni, infektsiia aýa tamshy joldary arqyly juǵady. Al aýyzdan alynǵan test arqyly juqtyrǵannan keiingi3 kún ishinde anyqtaýǵa bolady», - deidi Ǵalymjan Toǵyzbaev.
Ekpress-testileý arqyly koronavirýs diagnozy qoiylmaidy. Ol arqyly aǵzadaǵy virýsty anyqtaý múmkin emes. Bul jerde tek qana aǵzanyń immýndyq qarsylyǵyn, antideneniń bar ekeni kórsetiledi. Ol úshin saýsaqtan qan alynady. Nátijesin 15 minýtta bilýge bolady.
Qazir Almatydaǵy 6 zerthana da PTR-diagnostikany qoldanyp otyr. Bul testileýden tek qaýpi joǵary nysandardyń qyzmetkerleri ǵana tegin ótedi. Ony epidemiologtar aiqyndaidy.
