Koronavirýsty anyqtaityn qazaqstandyq test áli tirkelgen joq. Bul týraly QR DSM Taýarlar men kórsetiletin qyzmetterdiń sapasy men qaýipsizdigin baqylaý komitetiniń tóraǵasy Timýr Sultanǵaziev aitty.
«Qazirgi ýaqytta PTR-zerthanalyq testileý sany artyp kele jatyr. Kóktemde táýligine 25 myń testileý júrgizilse, tamyz aiynyń sońynda onyń sany 40 myńǵa deiin jetti. Qyrkúiekte qosymsha 20 PTR apparaty satyp alyndy. Al veterinarlyq zerthanalar elimizdiń aýdandarynda ashyldy. Endi qazan aiynda kúnine 60 myńǵa deiin PTR-testileý ótkizetin bolamyz. Sol arqyly halyqty barynsha PTR testileýden ótkizemiz. Daiyndyq júrgizilip jatyr», - dedi komitet tóraǵasy elordadaǵy №6 qalalyq emhanada BAQ ókilderiniń saýalyna orai.
Onyń aitýynsha, shilde aiynda Úkimet rezervinen qosymsha qarajat bólinip, 1,2 mln test satyp alynǵan.
«Densaýlyq saqtaý ministrliginiń tiisti zerthanalary bar. Solar arqyly satylyp alynyp jatyr. Buǵan qosa, árbir densaýlyq saqtaý mekemesinde Áleýmettik meditsinalyq saqtandyrý qory arqyly testter satyp alynyp, syrqattanǵan adamdardy tekserý júrgizilýde. Negizinen sheteldik test júiesin satyp alýdamyz. Qazaqstandyq test júiesi áli tirkeýden ótken joq. Tiisti tirkeý protsedýrasynan ótkennen keiin olardy satyp alýymyz múmkin», - dedi Timýr Sultanǵaziev.
