Koronavirýstyń bar-joǵyn anyqtaý úshin 14 kúndik karantin jetkilikti me? Bul suraqqa Densaýlyq saqtaý ministri Eljan Birtanov jaýap berdi, dep habarlaidy QazAqparat tilshisi.
«Karantin merzimine qatysty túrli oi-pikirler bola beredi. Biraq biz Dúniejúzilik densaýlyq saqtaý uiymynyń tikelei keńesimen osyndai sheshim qabyldap jatyrmyz. Jalpy basqa da ministrliktermen tikelei bailanystamyz. Búkil dúnie júzinde karantin merzimi 14 kúndik tártippen júrgiziledi. 14 kúnnen keiin taǵy 10 kún telefon arqyly baqylaýda ustaimyz. Sebebi árbir adamnyń genetikasy ártúrli», - dedi Eljan Birtanov «Habar 24» arnasyna bergen suhbatynda.
Aita ketsek buǵan deiin Densaýlyq saqtaý ministri elimizde koronavirýs infektsiiasynyń aldyn alý jumystary qalai júrgizilip jatqanyn aityp bergen edi. Onyń aitýynsha jalpy dúnie júzi virýstyń jańa túri boiynsha qiyn jaǵdaida. Árbir memleket óziniń zańy boiynsha azamattaryn qorǵaýda.
«Bizdiń de negizgi maqsatymyz – halyqtyń densaýlyǵy. Eshqandai qaýip joq. Tek karantin. Osy ýaqytqa deiin Ýhannan 300-ge tarta óz azamattarymyzdy, basqa sheteldik azamattardy ákelip, karantinnen ótkizdik. Eshqandai koronavirýs tabylǵan joq. Bári úilerine tarap ketti. Qazir de Qytaidan keletin azamattarǵa karantin engiziletin bolady. 20 aqpannan bastap 160 adam karantinde jatyr. Olardyń ishinde otandastarymyzben birge QHR-dyń da, basqa eldiń de azamattary bar», - dedi ol.
