Áleýmettik jelide koronavirýstan qaitys bolǵan áieldiń jedel járdemdi úsh ret shaqyrǵanyna qaramastan aýrýhanaǵa jatqyzylmaǵany týraly aqparat tarady. Osy jaǵdaiǵa qatysty QR Densaýlyq saqtaý ministri Eljan Birtanov pikir bildirdi, dep habarlaidy "Ult aqparat".
«Aqmola oblysynda qaitys bolǵan áieldiń qazasyna bailanysty jaqyndary men týystaryna taǵy da kóńil aitamyn. Áleýmettik jelide taraǵan aqparat boiynsha Aqmola oblysynyń densaýlyq saqtaý basqarmasy qyzmettik tekserý júrgizdi. Negizi bizge resmi túrde eshkim hat jazǵan joq. Tekserý nátijesinde meditsinalyq qyzmetkerler jaǵdai koronavirýsqa bailanysty bolýy múmkin ekenin boljamaǵany jáne jedel járdemdi birinshi ret shaqyrǵan kezde naýqas aýrýhanaǵa jatqyzylmaǵany anyqtaldy. Naýqasqa sýyq tiiýine bailanysty em-dom jazyp bergen. Naýqastyń týystaryna túsindirý jumystary júrgizilmegen, sonyń saldarynan ol aýrýhanaǵa kesh jatqyzylǵan. Bul jaǵdai adam ólimimen aiaqtaldy. Tekserý barysynda osyndai kemshilikter anyqtalyp, jedel járdem qyzmetiniń bas dárigeri men densaýlyq saqtaý basqarmasynyń basshysyna tártiptik jaza qoldanyldy», - deidi QR Densaýlyq saqtaý ministri Eljan Birtanov.
Onyń aitýynsha, test nátijesine qatysty qatelikter bolǵan.
«Tehnikalyq sebeppen test nátijesin berýge qatysty qatelikter bolǵan. Sol kúni zerthanada júkteme kóp bolǵan, sondyqtan testiń sońǵy nátijesi sál keshirek shyqqan. Test nátijesi naýqas qaitys bolǵannan keiin daiyn bolǵan. Bul jaǵdaiǵa qatysty máseleni talqylap, zerthanalar turaqty túrde jumys isteý jaǵyn qarastyrdyq. Tek bir zerthananyń ózinde ǵana kúnine myń test jasalady. Bir qurylǵydan eń kóp degende 30 test ótkizýge bolady. Biz mundai jaǵdai qaitalanbas úshin bar kúshimizdi salamyz», - deidi ol.
