Koronavirýstan qaitys bolǵandardy jerleý týraly bas sanitarlyq dárigerdiń qaýlysy shyǵady, dep habarlaidy QazAqparat.
Bul týraly QR Aqparat jáne qoǵamdyq damý ministri Dáýren Abaev «Habar 24» telearnasynyń tikelei efirinde málimdedi.
«Koronavirýstan adam qaitys bolýyna bailanysty jýrnalister marqumdy qalai jerleý kerektigi týraly surap jatyr. Búgin keshke nemese erteń tańerteń bas sanitarlyq dárigerdiń resmi qaýlysy shyǵady. Onda qatań saqtalýy kerek erejeler kórsetiledi. Dárigerler aitqan talaptardy qatań saqtaý qajettigi týraly Qazaqstan musylmandary dini basqarmasy men Pravoslavie shirkeýi tiisti pátýa men eskertýler ázirledi.
Sonymen birge, ministr koronavirýs infektsiiasynan keshe qaitys bolǵan áiel týraly pikir bildirdi.
«Bizden tańerteń qaitys bolǵan áieldiń diagnozyn nege keshke habarlaǵanymyzdy surap jatyr. Ólimniń naqty sebebi keshki ýaqytta ǵana anyqtaldy jáne tez arada buqaralyq aqparat quraldaryna habarlandy», - dedi D. Abaev.
Aita keteiik, koronavirýs infektsiiasymen Nur-Sultan qalasy boiynsha 60 adam, Almaty qalasynda – 48 adam, Qaraǵandy qalasynda - 4, Jambyl oblysynda -3 adam, Atyraý oblysy - 3 adam, Shymkent qalasynda - 2 adam, Almaty oblysynda - 1 adam, Aqtóbe oblysynda - 1 adam, Soltústik Qazaqstan oblysynda - 1 adam, Aqmola oblysynda - 1 adam, Pavlodar oblysynda - 1 adam, jalpy 125 naýqas tirkeldi.
Buǵan deiin Dáýren Abaev karantin rejimi kúsheitilgen kezdegi kóshede júrý talaptaryn túsindirgen edi.
