Osy aptadan bastap koronavirýstan ambýlatorlyq jaǵdaida emdelýshilerge dári-dármek emhanalardan tegin berile bastaidy, dep habarlaidy "Ult aqparat" QR Densaýlyq saqtaý ministrliginiń aqparattyq ortalyǵyna silteme jasap.
COVID-19 anyqtalǵan naýqastarǵa tirkelgen meken-jaiy boiynsha barlyq emhanalarda tegin dári-dármek beriledi. Densaýlyq saqtaý ministrligi indetti anyqtaýdyń jáne emdeýdiń hattamasyna tegin taratylatyn dáriniń 5 túrin engizdi. Olar: Paratsetamol, Ibýprofen, antikoagýlianttar, Rivaroksaban, Apiksaban jáne Dabigatran.
«Ózin jaisyz sezingen nemese dene qyzýy kóterilgen adamdar dereý emhanaǵa baryp qaralýy tiis. Eger mamandar koronavirýsqa uqsastyǵy bar belgilerge kóz jetkizgen jaǵdaida nusqaýlyq beredi. Tutynýǵa qajetti preparattardyń elektrondy tizimin jazady. Sáikesinshe, dárihanaǵa baryp jeke basyńyzdy kýálandyratyn qujatty kórsetip qajetti dárini tegin alasyz. Eger qajet dári bolmaǵan jaǵdaida «SQ-Farmatsiianyń» 1439 (qońyraý shalý tegin) bailanys ortalyǵyna habarlasý kerek. Operatorlar máseleni anyqtap, qajet dári qolyńyzǵa tigenshe járdem jasalady», delingen habarlamada.
«Árbir óńir óziniń qajettiligine qarai tapsyrys berdi. Osy aptadan bastap el turǵyndary emhanalardan tegin dárini ala alady. Dárigerlerdiń preparattardy taǵaiyndap jazyp berýine barlyq múmkindik jasalǵan», - dep málimdedi «SQ-Farmatsiia» JShS Basqarma tóraǵasy Erhat Esqaliev.
Aita keterligi, Apiksaban jáne Dabigatran dárileriniń Qazaqstanda balamasy joq. Buǵan deiin bul dáriler statsionarlyq kómek úshin qoldanylǵan jáne «SQ-Farmatsiianyń» qorynda jetkilikti deńgeide saqtaýly tur. Sonymen qatar, «Nobel» Almaty farmatsevtikalyq fabrikasy
Rivaroksaban dárisin tirkedi. Endi ol emhanalarǵa Rivaroks taýarlyq ataýymen jetkiziledi. Atalǵan preparat «SQ-Farmatsiianyń» qoimasyna jetkizildi, qazirgi ýaqytta elimizdegi emhanalarǵa jóneltilip jatyr.
«Otandyq zaýyt óndiristi iske qosty. Demek, ishki naryqtyń suranysyn tolyqtai oryndaýǵa múmkindik bar. Sonymen qatar, ekonomikalyq tiimdiligi de joǵary. Sheteldik dárilerge qaraǵanda 40 paiyz arzan», - dedi Erhat Esqaliev.
Sonymen qatar, Erhat Esqaliev qazirgi ýaqytta Paratsetamol dárisin satyp alýdyń rásimi júrip jatqanyn jetkizdi. Satyp alý aiaqtalǵansha onyń ornyn Ibýprofen preparaty almastyrady.
