Qasym-Jomart Toqaev koronavirýs indetiniń taralýyna qarsy is-qimyl sharalary jóninde keńeste memleket tarapynan koronavirýspen kúreske jumyldyrylǵan meditsina qyzmetkerlerine ústemaqy tóleý jalǵasatynyn atap ótti, dep habarlaidy "Ult aqparat" Aqordaǵa silteme jasap.
Jiynda QR Prezidenti memleket tarapynan koronavirýspen kúreske jumyldyrylǵan meditsina qyzmetkerlerine ústemaqy tóleý jalǵasatynyn atap ótti.
Memleket basshysy meditsina qyzmetkerlerin qajetti kólemdegi qorǵanysh quraldarymen qamtamasyz etýdi tapsyrdy. Bul úshin Úkimet otandyq betperdeler men basqa da jeke qorǵanysh quraldaryn óndirýshilerdi kepildi kólemdegi shikizatpen qamtamasyz etýdiń tetigin ázirleýi tiis. Pandemiiaǵa qarsy barlyq sharalar meilinshe ashyq bolýy qajet.
– Úkimet jemqorlyqqa jol berilýi múmkin barlyq ýchaskelerdi qatań baqylaýǵa alýy tiis. Pandemiianyń birinshi tolqyny kezinde jemqorlyqpen betpe-bet keldik. Bul – meditsinalyq betperdeler men dári-dármek baǵasyn arttyrý, baqylaý-ótkizý pýnkterindegi quqyq buzýshylyqtar, meditsina qyzmetkerlerine tólem taǵaiyndaý kezindegi jemqorlyq. Baqylaýshy organdardyń, iaǵni, politsiia qyzmetkerleriniń, ákimdikter men monitoring ótkizetin toptardyń jumys sapasyna erekshe nazar aýdarý qajet. Pandemiia kezinde olarǵa biznes pen azamattardy tekserýge zor, iaǵni, tótenshe ókilettikter berildi deýge bolady. Bul ózin-ózi aqtady. Mundai ókilettikterdi durys qoldanǵan jón, ony asyra paidalanýǵa bolmaidy. «Kimdi jáne qashan tekseretinimdi ózim bilemin» degen qaǵidaǵa jol berilmesin, – dedi Prezident.
