QR Premer-Ministriniń orynbasary Eraly Toǵjanov Shyǵys Qazaqstan oblysyndaǵy epidemiologiialyq ahýal máseleleri boiynsha jumys keńesin ótkizip, birqatar áleýmettik nysandardy aralady, dep habarlaidy "Ult aqparat".
Keńes qalalar men aýdandar ákimderiniń, ShQO boiynsha densaýlyq saqtaý basqarmasynyń, politsiia departamentiniń, taýarlar men qyzmetterdiń qaýipsizdigi sapasyn baqylaý departamentiniń basshylarynyń, bas sanitariia dárigerleriniń qatysýymen ótti.
Aimaq basshysy Danial Ahmetov qazirgi epidemiologiialyq jaǵdai týraly baiandady. 30 qazandaǵy jaǵdai boiynsha Shyǵys Qazaqstanda koronavirýs infektsiiasyn juqtyrýdyń 9565 jaǵdaiy tirkelgen.
Oblys ákiminiń aitýynsha, eń qiyn jaǵdai Óskemen, Glýbokoe jáne Aiagóz aýdandarynda oryn alǵan. Baqylaýda 585 infektsiia oshaǵy, 1592 bailanysta bolǵan adam bar. COVID-19 taralý qaýpin azaitý jáne bailanysta bolǵandar men olardyń jaqyndaryn ýaqtyly anyqtaý úshin 516 meditsina brigadasy, sondai-aq oshaqtardy oqshaýlaý ortalyǵy jumys isteidi.
Koronavirýstyń ekinshi tolqyny bastalǵan kezeńde ýaqytyly sapaly meditsinalyq kómek kórsetý úshin oblysta 40 infektsiialyq statsionar daiyndaldy, tolyq meditsinalyq jabdyqtalǵan 6,1 myń tósek-oryn uiymdastyryldy. Sonymen qatar, Danial Ahmetov atap ótkendei, birinshi jaǵdai tirkelgen sátten bastap infektsiialyq statsionarlardyń tósek sany 12 esege artty.
Oblys qajetti jabdyqtarmen qamtamasyz etilgen, qazir aýrýhanalarda 18 kompiýterlik tomograf, 67 rentgen apparaty, 1,1 myńnan astam ottegi kontsentratory, 300-den astam ÓJJ apparaty bar. Aldaǵy kúnderi barlyq aýdandyq jáne qalalyq meditsinalyq uiymdar ottegimen qamtamasyz etýdiń arnaiy júielerimen jaraqtandyrylatyn bolady. Oblys boiynsha tósek qorynyń jumyspen qamtylý paiyzy 26,5 qurady.
Budan basqa, Resei Federatsiiasynan qajetti meditsinalyq preparattardy satyp alý boiynsha jumystar jalǵasýda. Sondai-aq, óńirde dárilik zattardyń eki ailyq qory bar. 10 kún ishinde aýrýhanalar bazasynda alty PTR-zerthana jasaqtaldy. Sonyń nátijesinde óńirde zerthanalardyń qýaty táýligine 6 myń testini quraidy.
Keńes qorytyndysy boiynsha Eraly Toǵjanov oblys ákimdigine on kúndik merzimde óńirdegi epidemiologiialyq jaǵdaidy turaqtandyrý boiynsha túbegeili sharalar qabyldaýdy tapsyrdy. Osyǵan bailanysty, 2 qarashadan bastap Óskemennen kirýge jáne shyǵýǵa áýe jáne temirjol qatynastaryn qysqartý, oblysqa kirýge jáne shyǵýǵa shekteý qoiý, sanitarlyq beketter ornatý, demalys jáne mereke kúnderi shekteý sharalaryn kúsheitý, qoǵamdyq kóliktiń qatynaý sanyn ulǵaitý, adamdar kóp jinalatyn jerlerge erekshe nazar aýdara otyryp, monitoringtik toptardyń karantindik rejimdi saqtaý jónindegi jumysyn kúsheitý, halyq arasynda karantindik rejimdi saqtaý qajettiligi týraly aqparattyq-túsindirý jumystaryn kúsheitý boiynsha sharalar qolǵa alyndy.
Keńesten keiin QR Premer-Ministriniń orynbasary 150 tósekke arnalǵan burynǵy JJMJ bazasyndaǵy pýlmonologiialyq ortalyqqa bardy. 15 qarashaǵa qarai munda táýlik boiy jumys isteitin statsionar, anesteziia, reanimatsiia jáne qarqyndy terapiia bólimshesi óz jumysyn bastaidy. Barlyq qajetti zamanaýi jabdyqtar, sonyń ishinde kompiýterlik tomografiia apparaty jetkizildi. Ár bólmede ottegi rozetkalary bar. Sondai-aq pýlmonologiia ortalyǵynda óziniń PTR-zerthanasy jumys isteitin bolady.
Eraly Toǵjanov Shyǵys Qazaqstan oblystyq mamandandyrylǵan meditsinalyq ortalyǵynyń, ana men bala ortalyǵynyń, sondai-aq onkologiia jáne hirýrgiia ortalyǵynyń jabdyqtalý deńgeiin joǵary baǵalady. Ana men bala ortalyǵynda balalar neirohirýrgiiasy jáne kardiohirýrgiia, travmatologiia, oftalmologiia, ońaltý qyzmetteri jumys isteidi.
Aita keteiik, dárigerler biregei oftalmologiialyq jabdyqtyń kómegimen 38 shala týǵan balanyń kórý qabiletin saqtap qaldy. Onkologiia jáne hirýrgiia ortalyǵynda búginde – kompiýterlik tomografiia jáne magnittik-rezonanstyq tomografiia iske qosylǵan. Mamandar úshinshi jyl qatarynan munda 128 bólikke arnalǵan biregei kompiýterlik tomografpen jumys isteidi. Elimizde osyndai 3 KT apparaty bar, onyń ishinde 2 – Óskemende jáne bireýi Nur-Sultanda. Ótken jyly ortalyqqa 3 magnittik-rezonanstyq tomograf satyp alyndy. Qazir MRT apparatyn ornatý jumystary júrgizilýde.
«Zamanaýi meditsinalyq jabdyqtar adamdardyń densaýlyǵyn qalpyna keltirýge, ómirin saqtap qalýǵa jańa múmkindikter ashady. Sondai-aq, dárigerlerdiń tájiribesi men biliktiligi, olardyń kásibi daiyndyǵy úlken mańyzǵa ie. Meditsinadaǵy basty másele-aýrýlardy diagnostikalaý. Shyǵys Qazaqstanda aýrýlardy erte kezeńderde dál, jyldam jáne tiimdi diagnostikalaý úshin barlyq múmkindikter bar ekeni qýantady. Onkologiia salasynda sizdiń tájiribeńiz biz úshin óte mańyzdy. Qazir elordada úlken onkologiialyq ortalyq salynýda, biz sizden usynystar alýǵa qýanyshtymyz», – dedi Eraly Toǵjanov.
Sonymen qatar, vitse-premer bastaǵan delegatsiia «Jumyspen qamtý jol kartasy» aiasynda kúrdeli jóndeý jumystary júrgizilgen áleýmettik nysandardy aralady. Osyndai nysandardyń ishinde «Januia» otbasyn qoldaý ortalyǵy bar, endi qala turǵyndary «bir tereze» qaǵidaty boiynsha AÁK alý, jumysqa ornalasý, óz isin ashý, turǵyn úi baǵdarlamalaryna qatysý, sondai-aq zańgerlik jáne psihologiialyq kómek alý boiynsha suraqtarǵa jaýap ala alady. Osydan keiin delegatsiia Óskemendegi eń tanymal balalar mekemeleriniń biri – jańartylǵan jas tehnikter stantsiiasynda boldy. Endi balalar shyǵarmashylyq úiirmelerge úlken qyzyǵýshylyqpen qatysady, óitkeni JTS jańa zamanaýi dizain, jaily interer ǵana emes, sonymen qatar jańa baǵyttar paida boldy: ushqyshsyz ushý apparattary, 3D-modeldeý, baǵdarlamalaý.
Eraly Toǵjanov «Ertis kontsert» ǵimaratynda júrgizilgen jumystarǵa da riza boldy. Epidemiologiialyq jaǵdai jaqsarǵannan keiin oblys turǵyndary aldynda mádeniet jáne óner oshaǵynyń jańartylǵan zaldary, onyń ishinde 744 orynǵa arnalǵan kontsert zaly ashylady.
Jumys saparynyń sońynda QR Premer-Ministriniń orynbasary D. Serikbaev atyndaǵy ShQMTÝ. ǵylymi-zertteý jáne tájiribelik-konstrýktorlyq jumystardyń jobalarymen tanysty. Ǵylymi qyzmetkerler MRT úshin joǵary ótkizgish sym jasaý, titan, tantal jáne niobiiden implantattar shyǵarý, myrysh pen qorǵasyn alýdyń pirometallýrgiialyq protsesterin jańǵyrtý boiynsha jumys isteýde. Eraly Toǵjanov atalǵan ázirlemelerdiń mańyzdylyǵy men perspektivalaryn, elimizdiń ǵalymdary men tehnikalyq joǵary oqý oryndary arasynda tájiribe almasý qajettiligin atap ótti, sondai-aq QR BǴM-ge ýniversitetpen birlesip ázirlemeler baǵytyndaǵy jumysty kúsheitýdi, al JOO-ǵa jobalardy iske asyrý naryǵyn keńeitý boiynsha usynystar daiyndaýdy tapsyrdy.
