Koronavirýs indetimen ekinshi ret aýrýdyń saldary qandai bolmaq? Koronavirýstan qalai saqtanǵan jón? Bul saýaldarǵa Nur-Sultan qalalyq kópbeiindi №1 aýrýhanasy bas dárigeriniń mindetin atqarýshy Marat Ábdýov jaýap berdi, dep habarlaidy QazAqparat.
«Koronavirýs indetine qaita shaldyǵý aýrýdyń ótý barysyn kúrdelendirip jiberedi. Qant diabeti jáne ózge de sozylmaly janama aýrýlarmen túsetin naýqastarda koronavirýs óte aýyr júredi. Degenmen biz úlken tájiribe jinap aldyq. Is júzinde barlyq naýqasty emdep shyǵarýǵa bolady», - dedi ol.
Sonymen qatar ol koronavirýs indetimen qaitadan statsionar kómegine júgingen naýqastar jaiynda aityp berdi.
«Koronavirýstyq ókpe qabýynan jazylyp shyqqannan keiin bir nemese eki aptadan keiin olar qaitadan asqynýlarmen túsip jatady. Biraq, olardyń belgileri basqa bolady. Bul rette naýqastyń jasy men janama aýrýlaryn eskergen jón. Búkil halyq úshin bul jaǵdai ońaiǵa soqpaǵanyn túsinemiz. Uzaqqa sozylǵan karantin kezeńi kópshilikke unamaidy, adamdar narazylyq ta tanytyp jatady. Degenmen, biz ózimizge ǵana emes tóńiregimizdegi adamdarǵa da qamqorlyq tanyta bilýimiz qajet. Karantinniń kezeń-kezeńimen alynyp tastalýy barlyq shekteý sharalarynyń joiylǵandyǵyn bildirmeidi. Buqaralyq sharalarǵa, otbasylyq toi-tomalaqqa barmaǵan jón. Maska rejimin saqtaý qajet», - dedi Marat Ábdýov.
