QR Densaýlyq saqtaý vitse-ministri – Bas memlekettik sanitar dáriger Erlan Qiiasovtyń qaýlysymen koronavirýspen aýyryp jatqan naýqastardyń daýys berý algoritmi bekitildi, dep habarlaidy "Ult aqparat".
Atalǵan qaýlyǵa sáikes, sailaý komissiiasynyń múshesi sailaýshylardan densaýlyq jaǵdaiy nemese otbasynyń naýqas múshesine kútim jasaý sebebimen kelgen jeri boiynsha daýys berý týraly ótinishti qabyldai otyryp: úide emdelýine nemese KVI boiynsha karantinde bolýyna bailanysty ózin-ózi oqshaýlaý rejimi nusqamasynyń bolýy týraly aqparatty naqtylaýy; sanitariialyq qaýipsizdik sharalarynyń saqtalýyn eskere otyryp, daýys berý rásimin túsindirýi tiis.
Sailaý ýchaskesinen tys jerde daýys berýdi uiymdastyrý úshin shyǵýdy júzege asyratyn sailaý komissiiasynyń músheleri jeke qorǵanysh quraldarymen (bir ret qoldanylatyn halattar, qorǵanysh maskalary, bir ret qoldanylatyn qolǵaptar, qolǵa arnalǵan antiseptikalyq quraldar) qamtamasyz etiledi.
Sailaýshylarǵa qajet bolǵan jaǵdaida jeke qorǵanysh quraldary (bir ret qoldanylatyn qorǵanysh maskasy, qolǵap, qalam) beriledi. Sailaýshynyń jeke basyn kýálandyratyn qujat sailaý komissiiasynyń múshesine onda kórsetilgen málimetterdi qaraýǵa múmkindik beretin qashyqtyqtan usynylady. Bul rette sailaýshy jeke basyn rastaý úshin maskany ýaqytsha sheshedi.
Úide emdelýine nemese KVI boiynsha karantinde bolýyna bailanysty ózin-ózi oqshaýlaý rejimindegi sailaýshylarǵa shyǵý kezinde daýys berý páterge (úige) kirmei uiymdastyrylýy tiis. Mundai daýys berýdi bailanyssyz tásilmen, mysaly, saty alańynda (úi mańyndaǵy aýmaqta) daýys berýge qatysýshyǵa daýys berýge arnalǵan biýlletendi jáne úi-jaidan tys jerde daýys berý týraly ótinishti berý, sodan keiin odan ótinishti alý jáne biýlletendi tasymaldanatyn jáshikke salý arqyly ótkizýge bolady.
Daýys berýge arnalǵan biýlletendi alǵanǵa deiin daýys berýge qatysýshy maska taǵyp, qolyn antiseptikpen óńdeýi tiis. Joǵaryda kórsetilgen áreketterden keiin ýchaskelik komissiia músheleri mindetti túrde qoldaryn, tasymaldanatyn jáshiktiń betterin dezinfektsiialaidy. Jeke qorǵanysh quraldaryn qaita paidalanýǵa jol berilmeidi. Kórsetilgen jeke qorǵanysh quraldary tyǵyz jabylatyn konteinerge nemese odan ári kádege jaratý úshin bakqa salynýy tiis.
Statsionarlyq emdeý mekemelerde qurylǵan sailaý ýchaskelerinde daýys berýdi uiymdastyrý karantindik talaptar qatań saqtalǵan jaǵdaida ótkiziledi.
