Koronavirýsqa qarsy preparattardyń baǵasy arzandady, dep habarlaidy "Ult aqparat" Dárilik zattar men meditsinalyq buiymdardy saraptaý ulttyq ortalyǵynyń málimetterine silteme jasap.
Dárilik zattar men meditsinalyq buiymdardy saraptaý ulttyq ortalyǵy men Básekelestikti qorǵaý jáne damytý agenttiginiń birlesken jumysynyń qorytyndysy boiynsha koronavirýs infektsiiasyna qarsy preparattar úshin shekti baǵalardy qalyptastyrýdyń erekshe tártibi kózdelgen.
Shekteý is-sharalary, onyń ishinde karantin kezinde qoldanylatyn shekti baǵalardy qalyptastyrýdyń erekshe tártibi boiynsha kóterme jáne bólshek saýdada marketingtik shyǵystarsyz, ústeme baǵalardyń regressivti shkalasyna sáikes dárilerdiń tizimi Dárilik zattar men meditsinalyq buiymdardy saraptaý ulttyq ortalyǵyna jiberiledi.
Bul tizimdegi dárilik preparattarǵa suranys kóp bolǵandyqtan, kóterme jáne bólshek saýdada 30 paiyz mólsherindegi marketingtik shyǵystar alyp tastalǵan. Sondai – aq, kóterme jáne bólshek ústeme baǵa eki ese tómendedi. Eger buryn kóterme ústeme baǵa 20 paiyzǵa jetken bolsa, onda antikovidti preparattar úshin tiisinshe 10, eger bólshek ústeme baǵa 55 paiyzǵa deiin jetken bolsa, antikovidti preparattar úshin 27 paiyzǵa tómendegen. Mysaly, Kardiomagnil 75 mg №30, 75 mg №100, 150 mg №30 preparaty úshin bólshek ústeme baǵa 22,5 paiyzdy, al Kardiomagnil 75 mg №100 preparaty 17,5% paiyzdy quraidy. Osylaisha, barlyq antikovidti preparattarǵa arnaiy tártip qoldanylady.
Básekelestikti qorǵaý jáne damytý agenttiginiń derekteri boiynsha, antikovidti preparattardyń baǵasy naryqtyq baǵamen salystyrǵanda 27% paiyzǵa tómendegen. Bul sharalar qazaqstandyqtardyń antikovidti preparattarǵa shyǵynyn azaitý men alypsatarlyq áreketterdiń aldyn alýǵa baǵyttalǵan.
Qazaqstan aýmaǵynda dárilik zattardyń baǵalaryn retteý jónindegi ókilettikter QR Densaýlyq saqtaý ministrligine júktelgen. Al dárilik zattardy belgilengen shekti baǵadan qymbat satý áreketi úshin Qazaqstan Respýblikasynyń Ákimshilik quqyq buzýshylyq týraly Kodeksiniń 426-baby boiynsha ákimshilik jaýapkershilik qarastyrylǵan.
Sonymen qatar, qazaqstandyqtar Dari.kz mobildik qosymshasynyń kómegimen dárihanalardaǵy qandai da bir preparattyń baǵasyn óz betinshe baqylai alady. Eger de dári-dármektiń baǵasy bekitilgen baǵadan joǵary bolsa, onda arnaiy formany toltyryp, shaǵym qaldyrýǵa múmkindik bar.
Osy rette dárilik zattardyń emdik qasietteri original preparatpen birdei bolyp keletin analogtary bolatynyn eskergen jón. Mysaly, kardiomagnil preparatynyń (belsendi zaty atsetilsalitsil qyshqyly) 23 analogy, ibýprofenniń (belsendi zaty bar ibýprofen) 56 analogy, sýmamedtiń (belsendi zaty azitromitsin) 50 analogy, ksareltonyń (belsendi zaty rivaroksaban) 4 analogy, kleksannyń (belsendi zaty natrii enoksaparin) 2 analogy bar.
